وزیراعظم شہباز شریف کا بجٹ منظوری پر اتحادی جماعتوں کا شکریہ

وزیراعظم شہباز شریف نے وفاقی کابینہ اور ارکان پارلیمنٹ کے اعزاز میں ایک ناشتے کا اہتمام کیا جس میں چیئرمین سینیٹ، وزرا اور اتحادی جماعتوں کے نمائندے شریک ہوئے۔ اس موقع پر وزیراعظم شہباز شریف نے اراکین سینیٹ و قومی اسمبلی سے ملاقات میں بجٹ کی منظوری پر اظہار تشکر کیا اور کہا کہ اتحادی جماعتوں نے بجٹ پاس کرانے میں اہم کردار ادا کیا۔ انہوں نے زور دیا کہ پاکستان کی معاشی ترقی کے لیے تمام جماعتوں کو مل کر دن رات محنت کرنا ہوگی تاکہ ملک کو درپیش مشکلات سے نکالا جا سکے۔

شہباز شریف نے کہا کہ بھارت کی حالیہ بلاجواز جارحیت کے مقابلے میں پاکستان نے اللہ کے فضل سے شاندار فتح حاصل کی۔ انہوں نے افواج پاکستان، سیاسی قیادت، سول سوسائٹی، میڈیا اور عوام کی یکجہتی کو دشمن کے ناپاک عزائم ناکام بنانے کا ذریعہ قرار دیا۔ وزیراعظم نے بلاول بھٹو زرداری کی قیادت میں سفارتی وفد کی کوششوں کو سراہا، جنہوں نے بین الاقوامی سطح پر پاکستان کا مؤقف مؤثر انداز میں اجاگر کیا اور بھارت کو دنیا کے سامنے بے نقاب کیا۔

انہوں نے کہا کہ پاکستان ہمیشہ امن کا داعی رہا ہے لیکن جارحیت مسلط کی گئی تو افواج پاکستان نے بھرپور دفاع کیا۔ شہباز شریف نے پاک بھارت جنگ میں کامیابی پر اراکین پارلیمنٹ کو مبارکباد دیتے ہوئے کہا کہ ملکی وقار اقوام عالم میں بلند ہوا ہے۔ اس کے ساتھ ساتھ وزیراعظم نے اسرائیلی جارحیت کے دوران ایران سے یکجہتی کے اظہار اور ایرانی قیادت سے رابطوں کو بھی اجاگر کیا، اور امید ظاہر کی کہ ایران اسرائیل تنازع کا حل خطے میں دیرپا امن اور خوشحالی کے دروازے کھولے گا۔