news
جسٹس منصور علی شاہ کا وزیراعلیٰ خیبرپختونخوا کو مشورہ
وزیراعلیٰ خیبرپختونخوا علی امین گنڈاپور نے سپریم کورٹ کے سینئر جج جسٹس منصور علی شاہ سے درخواست کی کہ انہیں پاکستان تحریک انصاف کے سربراہ عمران خان سے ملاقات کی اجازت دی جائے تاکہ خیبرپختونخوا اسمبلی کے جاری بجٹ سیشن کے دوران اہم فیصلوں میں رہنمائی حاصل کی جا سکے۔ وہ اپنے وکیل لطیف کھوسہ اور ایڈووکیٹ جنرل شاہ فیصل کے ہمراہ عدالت میں پیش ہوئے اور مؤقف اپنایا کہ بجٹ کی منظوری ایک سنجیدہ عمل ہے اور پارٹی سربراہ کی مشاورت ناگزیر ہے، تاہم بارہا کوششوں کے باوجود ملاقات ممکن نہیں ہو سکی۔ جس پر جسٹس منصور نے درخواست سننے سے معذرت کرتے ہوئے کہا کہ یہ معاملہ عدالت کے دائرہ اختیار میں نہیں آتا اور جوڈیشل سائیڈ پر کچھ نہیں کیا جا سکتا۔ انہوں نے مشورہ دیا کہ وزیراعلیٰ سپریم کورٹ کے رجسٹرار یا چیف جسٹس یحییٰ آفریدی سے براہ راست رجوع کریں کیونکہ یہی مؤثر اور مناسب راستہ ہوگا۔ جب لطیف کھوسہ نے معاملے کو چیف جسٹس تک پہنچانے کی استدعا کی تو جسٹس منصور علی شاہ نے ایک بار پھر دوٹوک انداز میں کہا کہ عدالتی کارروائی کے دائرے میں یہ درخواست نہیں آتی اور براہ راست چیف جسٹس یا رجسٹرار سے رجوع ہی بہتر راستہ ہے۔