news
یاسر حسین کی والدہ کی قبر پر حاضری، نیکی کا بھولا ہوا عمل پھر یاد آ گیا
پاکستانی شوبز کے معروف اداکار اور ہدایت کار یاسر حسین نے اپنی مرحومہ والدہ کی قبر پر حاضری کا ایک جذباتی احوال انسٹاگرام پر شیئر کیا ہے۔ انہوں نے اپنی پوسٹ میں بتایا کہ شدید گرمی کے دن وہ والدہ کی قبر پر گئے تو وہاں ایک پانی کی ٹنکی دیکھی جس پر ان کی والدہ، زوجہ خادم حسین، کا نام ایصالِ ثواب کے طور پر درج تھا۔ یہ ٹنکی یاسر کے اہل خانہ نے پانچ سال قبل لگوائی تھی، اور آج بھی لوگ اس سے پانی پی کر سیراب ہو رہے تھے۔
یاسر حسین نے لکھا کہ جب انہوں نے بچوں اور راہ گیروں کو اس ٹنکی سے پانی پیتے اور بوتلیں بھرتے دیکھا تو ان کا دل خوشی سے بھر گیا۔ ان کا کہنا تھا کہ یہ ایک ایسا نیکی کا عمل تھا جو وقت کے ساتھ ذہن سے نکل گیا تھا، لیکن آج اس کے جاری اثرات دیکھ کر انہیں دوبارہ ایسا قدم اٹھانے کی ترغیب ملی ہے۔ یاسر نے وعدہ کیا کہ وہ آئندہ بھی ایسے کام کرتے رہیں گے اور اپنے مداحوں کے ساتھ اس کا اشتراک کریں گے۔
سوشل میڈیا پر صارفین نے یاسر حسین کے اس عمل کو خوب سراہا، ان کے لیے دعائیں کیں اور نیک تمناؤں کا اظہار بھی کیا۔