آیت اللہ خامنہ ای کا دوٹوک پیغام: ایرانی قوم ہتھیار نہیں ڈالے گی

ایران کے سپریم لیڈر آیت اللہ علی خامنہ ای نے دو ٹوک مؤقف اختیار کرتے ہوئے کہا ہے کہ ایرانی قوم کبھی بھی دشمن کے سامنے ہتھیار نہیں ڈالے گی اور ملکی سالمیت کے تحفظ کے لیے ہر ممکن اقدام اٹھایا جائے گا۔ آیت اللہ علی خامنہ ای کا کہنا تھا کہ جو لوگ ایران کے عوام اور ان کی تاریخ سے واقف ہیں، وہ جانتے ہیں کہ یہ قوم ظلم کے آگے سر نہیں جھکاتی، ایران نے کسی پر جارحیت نہیں کی مگر کسی بھی زیادتی کو برداشت بھی نہیں کرے گا، اور جارحیت کا بھرپور جواب دیا جائے گا۔

ایران اور اسرائیل کے درمیان حالیہ جنگ بندی کے بعد پاسداران انقلاب کے کمانڈر انچیف میجر جنرل پاکپور نے فتح پر ملت ایران کو مبارکباد دی اور خبردار کیا کہ اگر امریکی صدر ڈونلڈ ٹرمپ یا کسی اور کی جانب سے دوبارہ ایران پر جارحیت کی کوشش کی گئی تو اسے منہ توڑ جواب دیا جائے گا۔ انہوں نے شہداء کے اہل خانہ کو خراج تحسین پیش کرتے ہوئے کہا کہ ایران ہر حال میں اپنی خودمختاری کا دفاع کرے گا۔

اسی تناظر میں ایرانی وزیر خارجہ عباس عراقچی نے بھی ایک بیان میں کہا کہ اسرائیل نے جو جارحیت کی، اس کا سخت اور فوری جواب دیا گیا۔ ان کا کہنا تھا کہ ایرانی مسلح افواج نے صبح 4 بجے تک دشمن کے حملوں کا جرأت مندی سے سامنا کیا، اور ان تمام سپاہیوں کا شکریہ ادا کیا جو اپنی جان کی بازی لگا کر مادر وطن کا دفاع کرتے رہے۔

واضح رہے کہ ایران اور اسرائیل کے درمیان جنگ بندی پر عمل درآمد شروع ہو چکا ہے۔ پاکستان کے وقت کے مطابق صبح 9 بجے سے سیز فائر کا اطلاق کیا گیا، جس کی تصدیق امریکی صدر ڈونلڈ ٹرمپ نے بھی اپنے بیان میں کی۔ امریکی نشریاتی ادارے سی این این کے مطابق ایران اور اسرائیل کے درمیان جنگ بندی کے بعد اسرائیل نے اپنی فضائی حدود دوبارہ کھول دی ہیں۔