ایرانی پاسداران انقلاب نے قطر میں امریکی فوجی اڈے پر حملے کی تصدیق کر دی

ایران کی پاسداران انقلاب نے تصدیق کی ہے کہ قطر میں موجود امریکی فوجی اڈے العدید ایئربیس کو میزائل حملے کا نشانہ بنایا گیا ہے۔ عرب میڈیا کے مطابق ایرانی پاسداران انقلاب کے ترجمان کا کہنا ہے کہ یہ حملہ دوست ملک قطر کے لیے کسی خطرے کا باعث نہیں بلکہ جنگ کے شعلے بھڑکانے والی امریکی حکومت کی کمزوری کو ظاہر کرتا ہے۔ دوسری جانب قطر کے وزیردفاع کا کہنا ہے کہ ان کے دفاعی نظام نے امریکی فوجی اڈے پر داغے گئے ایرانی میزائل حملے کو ناکام بنا دیا ہے۔ وزیردفاع نے واضح کیا کہ اگر ضرورت پڑی تو ایران کے اس اقدام کا جواب دینے کا حق قطر محفوظ رکھتا ہے کیونکہ ایسے اقدامات سے خطے کے امن اور استحکام کو نقصان پہنچ رہا ہے۔

دوحہ میں ایرانی پاسداران انقلاب حملے کے بعد ایئر ڈیفنس سسٹم کو فوری طور پر فعال کر دیا گیا جبکہ کسی جانی نقصان یا زخمی ہونے کی اطلاعات موصول نہیں ہوئیں۔ قطر میں حملوں کے بعد دارالحکومت میں زور دار دھماکوں کی آوازیں سنی گئیں، جس سے شہریوں میں شدید خوف و ہراس پھیل گیا۔ حملے کے بعد قطر نے اپنی فضائی آمد و رفت کو عارضی طور پر معطل کرنے کا فیصلہ کیا تاکہ شہریوں اور مسافروں کی حفاظت کو یقینی بنایا جا سکے۔ بعد ازاں سعودی عرب اور متحدہ عرب امارات نے بھی اپنی فضائی حدود بند کر دیں۔

اس کشیدہ صورتحال کے پیش نظر امریکہ نے قطر میں موجود اپنے شہریوں کو محفوظ پناہ گاہوں میں قیام کی ہدایت جاری کی ہے۔ امریکی سفارت خانے کی ایڈوائزری کے جواب میں قطری حکام نے سیکیورٹی کی صورتحال کو مستحکم قرار دیا ہے اور یقین دہانی کروائی ہے کہ وہ اپنے شہریوں اور غیر ملکیوں کے تحفظ کے لیے تمام ضروری اقدامات کر رہے ہیں۔ ایران کی جانب سے کیے گئے اس حملے نے مشرق وسطیٰ میں پہلے سے جاری کشیدگی کو مزید شدید کر دیا ہے، جس کے اثرات خلیجی ممالک کی سلامتی پر بھی مرتب ہو رہے ہیں۔