ایرانی وزیر خارجہ کی پیوٹن سے ملاقات، سپریم لیڈر کا خصوصی پیغام روس کے حوالے

روسی دارالحکومت ماسکو میں ایرانی وزیر خارجہ عباس عراقچی اور روس کے صدر ولادیمیر پیوٹن کے درمیان اہم ملاقات ہوئی، جس میں ایرانی وزیر خارجہ نے ایران کے سپریم لیڈر آیت اللہ علی خامنہ ای کا خصوصی پیغام روسی صدر کو پہنچایا۔ عالمی خبر رساں ادارے رائٹرز کے مطابق ملاقات کے دوران صدر پیوٹن نے ایران پر امریکی حملے کو بے بنیاد جارحیت قرار دیا اور کہا کہ روس ایرانی عوام کی حمایت جاری رکھے گا۔ ایرانی وزیر خارجہ کا یہ دورہ ایک ایسے وقت میں ہوا ہے جب امریکہ نے ایران کی تین جوہری تنصیبات کو نشانہ بنایا ہے، اور ایران کی قیادت نے عالمی سطح پر حمایت حاصل کرنے کی کوششیں تیز کر دی ہیں۔

اس ملاقات کا بنیادی مقصد امریکی حملے کے بعد پیدا ہونے والی صورتحال سے روسی قیادت کو آگاہ کرنا اور ایران کے لیے مزید عملی حمایت حاصل کرنا تھا۔ ایرانی ذرائع کا کہنا ہے کہ ایران اب تک روس کے ردعمل سے مکمل مطمئن نہیں اور صدر پیوٹن سے امید رکھتا ہے کہ وہ اسرائیل اور امریکہ کے خلاف ایران کے مؤقف کی مزید مؤثر انداز میں حمایت کریں گے۔

ادھر چینی وزارت خارجہ نے موجودہ صورت حال پر تشویش کا اظہار کرتے ہوئے کہا ہے کہ جنگ کے پھیلاؤ کو ہر صورت میں روکا جانا چاہیے اور تمام فریقین کو سیاسی حل کی جانب واپس آنا ہوگا۔ چینی ترجمان کے مطابق خلیجی خطہ نہ صرف مشرق وسطیٰ بلکہ عالمی معیشت کے لیے بھی ایک اہم گزرگاہ ہے اور اس میں جنگ کے شدت اختیار کرنے سے عالمی امن و اقتصادی استحکام کو شدید خطرات لاحق ہو سکتے ہیں۔ چین نے عالمی برادری پر زور دیا کہ وہ فوری اور سنجیدہ اقدامات کرے تاکہ خطے میں بڑھتی کشیدگی کو روکا جا سکے اور دنیا ایک نئے بحران سے بچ سکے۔