ایرانی رہنما علی شمخانی زندہ، اسرائیلی دعویٰ غلط ثابت

ایران کے سپریم لیڈر آیت اللہ علی خامنہ ای کے مشیر علی شمخانی منظرعام پر آ گئے ہیں۔ اسرائیلی فوج کی جانب سے ان کی ہلاکت کا دعویٰ کیا گیا تھا، تاہم ایرانی رہنماعلی شمخانی نے ایک پیغام میں اپنی زندگی اور ہوش و حواس میں ہونے کی تصدیق کر دی ہے۔ یہ پیغام انہوں نے 13 جون کی صبح اسرائیلی حملے میں شدید زخمی ہونے اور ہسپتال منتقل کیے جانے کے بعد ایرانی قیادت اور عوام کے لیے جاری کیا۔

اپنے پیغام میں ایرانی رہنماعلی شمخانی نے کہا: “میں زندہ ہوں اور قربانی دینے کے لیے تیار ہوں، فتح کا سورج طلوع ہونے والا ہے۔” انہوں نے مزید کہا کہ ڈاکٹروں کی انتھک محنت کے باعث اب ان کی طبی حالت مستحکم ہے اور وہ روبہ صحت ہیں۔ انہوں نے اس عزم کا اعادہ کیا کہ ایران کا نام ہمیشہ تاریخ میں روشن رہے گا۔

باخبر ذرائع کے مطابق، علی شمخانی حملے میں بری طرح زخمی ہوئے تھے اور ان کی بائیں ٹانگ کو کاٹنا پڑا۔ ڈاکٹروں نے ان کی جان بچانے کے لیے کئی بڑے طبی اقدامات کیے، جبکہ ان کے بعض اندرونی اعضا اب بھی خطرے میں ہیں۔

یاد رہے کہ اسرائیلی جارحیت میں ایران کی مسلح افواج کے کئی اہم کمانڈرز، جن میں چیف آف اسٹاف جنرل محمد باقری، پاسدارانِ انقلاب کے سربراہ میجر جنرل حسین سلامی، اور ایرو اسپیس فورس کے کمانڈر امیر علی حاجی زادہ شامل ہیں، شہید ہو چکے ہیں۔ ایسے میں سوشل میڈیا پر یہ افواہیں بھی گردش کر رہی تھیں کہ علی شمخانی بھی زخموں کی تاب نہ لاتے ہوئے شہید ہو گئے، تاہم ان کا تازہ بیان ان افواہوں کی تردید ہے اور اس نے ایران میں ایک نیا حوصلہ پیدا کیا ہے