ایس آئی ایف سی، پاکستان کی معیشت بحالی کی جانب گامزن

پاکستان کی معیشت بحالی اور ترقی کی راہ پر گامزن ہے، جس کا واضح ثبوت بین الاقوامی سطح پر اعتماد کی بحالی، ترسیلات زر اور غیر ملکی سرمایہ کاری میں ریکارڈ اضافہ ہے۔ اس مثبت رجحان میں اسپیشل انویسٹمنٹ فسیلیٹیشن کونسل (ایس آئی ایف سی) کا کلیدی کردار ہے، جو اپنے دوسرے سال میں بھی سرمایہ کاری، معاشی اصلاحات اور تجارتی سرگرمیوں کو فروغ دینے میں مصروفِ عمل ہے۔

مالی سال 2024-25 کے ابتدائی 11 مہینوں کے دوران بیرونِ ملک سے ترسیلات زر 34.89 ارب ڈالر کی سطح پر پہنچ گئیں، جن میں سعودی عرب، متحدہ عرب امارات، برطانیہ اور امریکا کا بڑا حصہ رہا۔ یہ اعداد و شمار نہ صرف بیرون ملک مقیم پاکستانیوں کے اعتماد کا مظہر ہیں بلکہ ملکی معیشت کے لیے بھی ایک مضبوط سہارا فراہم کر رہے ہیں۔

ایس آئی ایف سی کی کوششوں سے یورپی منڈیوں میں پاکستانی برآمدات میں 8.62 فیصد اضافہ دیکھنے کو ملا، جس کے تحت رواں مالی سال کے ابتدائی 10 مہینوں میں 7.553 ارب ڈالر کی برآمدات ریکارڈ کی گئیں۔ اس سے پاکستان کی بین الاقوامی تجارت میں پوزیشن مستحکم ہوئی ہے۔

سرمایہ کاری کے میدان میں بھی خاصی کامیابیاں حاصل ہوئیں، جہاں مختلف شعبہ جات جیسے تعمیرات، سیمنٹ، ربڑ، گھریلو اشیا اور سماجی خدمات میں غیر ملکی سرمایہ کاری میں اضافہ ریکارڈ کیا گیا۔ سرمایہ کاروں کے بڑھتے اعتماد کا اندازہ اس امر سے لگایا جا سکتا ہے کہ غیر ملکی کمپنیوں نے پاکستان سے منافع کی واپسی میں 115 فیصد اضافہ کیا، جو کاروباری ماحول کی بہتری کی علامت ہے۔

ماحول دوست ترقی کی جانب بڑھتے ہوئے، پاکستان نے اپنا پہلا گرین سکوک جاری کیا جس کے تحت 30 ارب روپے ماحولیاتی منصوبوں کے لیے مختص کیے گئے۔ یہ اقدام حکومت کے پائیدار ترقی کے عزم کو ظاہر کرتا ہے۔ مزید یہ کہ بین الاقوامی مالیاتی ادارے آئی ایم ایف نے بھی پاکستان کے لیے 1.4 ارب ڈالر کے پائیدار ترقیاتی فنڈز کی منظوری دے دی ہے، جو عالمی سطح پر پاکستان کی اقتصادی پالیسیوں پر اعتماد کا ثبوت ہے۔

ایس آئی ایف سی کی قیادت میں کی جانے والی اقتصادی اصلاحات، سرمایہ کاری کے فروغ اور ترقیاتی اقدامات نے نہ صرف موجودہ مالی چیلنجز پر قابو پانے میں مدد دی بلکہ پاکستان کو معاشی استحکام کی جانب بھی گامزن کر دیا ہے، جو ملک کے روشن مستقبل کی نوید ہے