بلاول بھٹو کا یورپین تھنک ٹینک سے خطاب

چیئرمین پیپلزپارٹی اور عالمی سفارتی مشن کے سربراہ بلاول بھٹو زرداری نے یورپین یونین کے تھنک ٹینک سے خطاب کرتے ہوئے کہا کہ پاکستان دنیا کے اُن چند ممالک میں شامل ہے جہاں دہشتگرد حملے سب سے زیادہ ہوئے ہیں۔ انہوں نے یہ بھی بتایا کہ پاکستان کے پاس ٹھوس شواہد ہیں جو یہ ثابت کرتے ہیں کہ بھارتی پراکسیز بلوچستان میں دہشتگرد کارروائیاں کر رہی ہیں۔ سفارتی وفد کی بریفنگ میں اس بات پر زور دیا گیا کہ بھارت نے سندھ طاس معاہدہ غیر قانونی طور پر معطل کر کے خطے میں ماحولیاتی اور سیاسی عدم استحکام پیدا کیا ہے۔ اگر یہ معاہدہ کمزور ہوا تو پورا خطہ بدامنی کی لپیٹ میں آ سکتا ہے۔ بلاول بھٹو زرداری نے اپنے خطاب میں کہا کہ پاکستان نے پہلگام واقعے پر بھارت کو آزادانہ تحقیقات کی پیشکش کی تھی، لیکن بھارت نے اس کے بجائے بلااشتعال جارحیت کا راستہ اختیار کیا۔ ان کا کہنا تھا کہ مودی حکومت نے پاکستان پر جھوٹے اور بے بنیاد الزامات عائد کیے، مگر آج تک کوئی قابلِ قبول شواہد پیش نہیں کیے گئے۔ بھارت کا رویہ نہ صرف غیر سنجیدہ بلکہ خطرناک بھی ہے، کیونکہ وہ ماحولیاتی وسائل کو بطور ہتھیار استعمال کر رہا ہے۔ انہوں نے خبردار کیا کہ اگر بھارت نے پاکستان کا پانی روکا تو پاکستان کا ردعمل یقینی ہوگا اور مجبوری میں اقدامات اٹھانے پڑیں گے۔ بلاول نے زور دیا کہ سندھ طاس معاہدے کی پاسداری ضروری ہے تاکہ خطے میں امن برقرار رہے۔