وزیراعظم شہباز شریف کا دوشنبے میں ماحولیاتی تبدیلی پر مؤقف

وزیراعظم شہباز شریف نے دوشنبے میں عالمی گلیشیئر کانفرنس سے خطاب کرتے ہوئے کہا کہ بھارت کی جانب سے سندھ طاس معاہدے کو یکطرفہ طور پر معطل کرنا قابل مذمت ہے اور پاکستان اپنے حصے کے پانی پر کوئی سمجھوتہ نہیں کرے گا۔ وزیراعظم شہباز شریف نے کہا کہ پاکستان ان دس ممالک میں شامل ہے جو موسمیاتی تبدیلی سے شدید متاثر ہو رہے ہیں، حالانکہ پاکستان کا فضا میں زہریلی گیسوں کے اخراج میں حصہ نصف فیصد سے بھی کم ہے۔ وزیراعظم نے گلیشیئرز کے تحفظ کی اہمیت پر زور دیتے ہوئے کہا کہ پاکستان میں تقریباً 13 ہزار گلیشیئرز موجود ہیں اور ملک کے پانی کا نصف حصہ ان پر مشتمل ہے، لیکن موسمیاتی تبدیلیوں کی وجہ سے یہ گلیشیئرز تیزی سے پگھل رہے ہیں۔ 2022 کے تباہ کن سیلاب کی مثال دیتے ہوئے انہوں نے بتایا کہ فصلیں اور انفراسٹرکچر بری طرح متاثر ہوئے۔ انہوں نے ترقی یافتہ ممالک پر زور دیا کہ وہ ترقی پذیر ممالک میں ارلی وارننگ سسٹمز سمیت ماحولیاتی تبدیلی سے نمٹنے کے لیے زیادہ سرمایہ کاری کریں اور اپنی ذمہ داریاں پوری کریں۔ وزیراعظم نے تاجک صدر امام علی رحمان کو کانفرنس کے انعقاد پر مبارکباد دی اور دونوں رہنماؤں نے تیل، گیس، دفاع، سکیورٹی اور انسداد دہشت گردی جیسے شعبوں میں تعاون بڑھانے پر اتفاق کیا۔ دورے کے دوران شہباز شریف کا تاجک وزیراعظم قاہر رسولزادہ نے پرتپاک استقبال کیا اور دونوں ممالک نے مختلف شعبوں میں تعاون بڑھانے کے عزم کا اظہار کیا۔