head lines
پاکستان میں مہنگائی میں 0.29٪ کمی، سالانہ شرح 1.35٪ ریکارڈ | ایف بی ایس رپورٹ 2025
حکومت نے دعویٰ کیا ہے کہ گزشتہ ہفتے ملک میں مہنگائی کی شرح میں 0.29 فیصد کمی واقع ہوئی۔ وفاقی ادارہ شماریات (FBS) کے مطابق سالانہ بنیاد پر مہنگائی کی مجموعی شرح 1.35 فیصد ریکارڈ کی گئی ہے۔ جاری کردہ رپورٹ کے مطابق 13 اشیائے خور و نوش کی قیمتوں میں اضافہ، 14 اشیاء کی قیمتوں میں کمی جبکہ 24 اشیاء کی قیمتوں میں استحکام دیکھا گیا۔
رپورٹ میں کہا گیا ہے کہ چکن، پیاز، لہسن، آلو، دال مسور، کوکنگ آئل، چاول، ایل پی جی، ڈیزل اور جلانے کی لکڑی کی قیمتوں میں کمی ریکارڈ کی گئی ہے۔ دوسری جانب ٹماٹر، انڈے، گڑ، دال مونگ، گندم کا آٹا، دال چنا، خشک دودھ، انرجی سیور اور کیلے مہنگی ہونے والی اشیاء میں شامل ہیں۔
سالانہ بنیاد پر زندہ برائلر مرغی کے نرخ 45 فیصد تک بڑھے، جبکہ دال مونگ 31 فیصد، خشک دودھ 24 فیصد، چینی 22 فیصد، انڈے 21.51 فیصد مہنگے ہوئے۔ اس کے برعکس پیاز 55 فیصد، آلو 30 فیصد، لہسن 29 فیصد، چائے 18 فیصد، گندم کا آٹا 17 فیصد اور دال ماش 16 فیصد سستی ہوئیں۔