news
سپریم کورٹ: مخصوص نشستوں کے کیس میں سنی اتحاد کونسل کی تمام درخواستیں مسترد
سپریم کورٹ نے مخصوص نشستوں سے متعلق کیس میں سنی اتحاد کونسل کی جانب سے بینچ پر اعتراضات اور 26ویں آئینی ترمیم کو مقدم رکھنے کی درخواست مسترد کر دی۔ جسٹس امین الدین خان کی سربراہی میں 11 رکنی آئینی بینچ نے محفوظ فیصلہ سناتے ہوئے قرار دیا کہ موجودہ بینچ ہی کیس کی کارروائی جاری رکھے گا۔
سپریم کورٹ نے واضح کیا کہ سنی اتحاد کونسل کا موجودہ بینچ پر اعتراض غیر مؤثر ہے اور بینچ کی آئینی حیثیت برقرار ہے۔ عدالت نے درخواست گزار کی جانب سے مقدمے کی براہ راست نشریات، بینچ کی تشکیل نو اور مقدمے کے التوا سے متعلق تمام متفرق درخواستیں بھی مسترد کر دیں۔
تاہم، عدالت نے کیس کی سماعت کو براہ راست نشر کرنے کی اجازت دیتے ہوئے سپریم کورٹ کے آئی ٹی ڈپارٹمنٹ کو لائیو اسٹریمنگ کے فوری انتظامات کی ہدایت جاری کی ہے۔
عدالت نے مخصوص نشستوں کے حوالے سے نظرثانی درخواستوں کی سماعت 26 مئی تک ملتوی کر دی۔ سنی اتحاد کونسل نے درخواست میں مؤقف اختیار کیا تھا کہ پہلے 26ویں آئینی ترمیم کی سماعت کی جائے اور نظرثانی بینچ میں اُن ججز کو شامل کیا جائے جنہوں نے 12 جولائی 2023ء کو فیصلہ سنایا تھا، تاہم عدالت نے یہ مؤقف مسترد کر دیا۔