news
بیرسٹر گوہر: عمران خان کسی ڈیل کا حصہ نہیں، سیاسی سیزفائر وقت کی ضرورت ہے
چیئرمین پاکستان تحریک انصاف (پی ٹی آئی) بیرسٹر گوہر نے میڈیا سے گفتگو میں بانی چیئرمین عمران خان کے کسی بھی بیک ڈور یا فرنٹ ڈور رابطے یا ڈیل کی سختی سے تردید کی ہے۔ ان کا کہنا تھا کہ عمران خان کبھی کسی خفیہ مفاہمت کا حصہ نہیں بنیں گے اور تمام سیاسی عمل صرف کھلے اور شفاف مذاکرات کے ذریعے ہی ممکن ہوگا۔ بیرسٹر گوہر نے کہا کہ پاکستان کو اللہ تعالیٰ نے بڑی کامیابی عطا کی ہے اور افواج پاکستان نے بھارت کے غرور کو خاک میں ملا دیا ہے۔ یوم تشکر پر انہوں نے مسلح افواج کو خراج تحسین پیش کرتے ہوئے ملک میں سیاسی سیزفائر کی ضرورت پر زور دیا۔ انہوں نے کہا کہ ملک کو موجودہ چیلنجز سے نکالنے کے لیے سیاسی کشیدگی کو ختم کر کے عوامی مسائل پر توجہ دینی چاہیے۔ بیرسٹر گوہر کا کہنا تھا کہ عمران خان کی ہدایت پر ہی پارٹی تمام امور چلا رہی ہے اور ان کے بیٹے قاسم و سلیمان بھی مکمل باخبر ہیں، جنہوں نے ڈیل کی افواہوں کی سختی سے تردید کی ہے۔ انہوں نے کہا کہ پی ٹی آئی ہر فورم پر بات چیت کی حامی ہے، لیکن کسی بھی قسم کی سودے بازی قابل قبول نہیں ہوگی۔