news
فواد چوہدری کا انکشاف: ججز کی ریٹائرمنٹ عمر میں اضافے کے بدلے مخصوص کیس میں حمایت کا وعدہ
سابق وفاقی وزیر فواد چوہدری نے ایک بڑا دعویٰ کرتے ہوئے کہا ہے کہ حکومت نے ججز سے وعدہ کیا ہے کہ ستائیسویں آئینی ترمیم لا کر ان کی ریٹائرمنٹ کی عمر میں پانچ سال کا اضافہ کیا جائے گا۔ ان کے مطابق بار ایسوسی ایشنز میں یہ بات عام ہے، اور خاص طور پر جسٹس امین الدین کے لیے یہ ترمیم اہمیت رکھتی ہے، جو جلد ریٹائر ہونے والے ہیں۔ فواد چوہدری کا کہنا ہے کہ مخصوص نشستوں سے متعلق مقدمے میں حکومت کو ججز سے مثبت فیصلے کی امید ہے، کیونکہ ان کے مطابق موجودہ حکومت کے لیے اس سے زیادہ موزوں ججز ممکن نہیں۔
فواد چوہدری نے اسٹیبلشمنٹ پر تنقید کرتے ہوئے کہا کہ گزشتہ چالیس سال نواز شریف اور زرداری کو مسلط رکھا گیا، اور اب انہی کے بچوں کو اقتدار میں لانے کی کوشش کی جا رہی ہے۔ ان کے بقول اقتدار عوام کو واپس دینا چاہیے اور بند کمروں میں فیصلے کرنا بند ہونے چاہئیں۔