پاک بھارت ڈی جی ایم اوز کے درمیان تیسرا رابطہ، سیزفائر برقرار رکھنے پر اتفاق

پاکستان اور بھارت کے ڈائریکٹر جنرلز آف ملٹری آپریشنز (ڈی جی ایم اوز) کے درمیان ہاٹ لائن پر تیسری بار رابطہ ہوا، جس میں زمینی صورتحال پر بات چیت کی گئی۔ دونوں فریقین نے 10 مئی کو طے شدہ سیزفائر اور اسٹیٹس کو برقرار رکھنے پر اتفاق کیا۔ باخبر ذرائع کے مطابق، یہ سیزفائر امریکہ اور دیگر دوست ممالک کی سفارتی کوششوں کی بدولت ممکن ہوا۔ دفتر خارجہ کے ایڈیشنل سیکرٹری اور ترجمان شفقات علی خان آج اس معاملے پر میڈیا کو بریفنگ دیں گے۔ سفارتی ذرائع کا کہنا ہے کہ دنیا کے اہم دارالحکومتوں کی جانب سے دونوں ممالک پر زور دیا جا رہا ہے کہ وہ کشیدگی سے بچیں اور اعتماد سازی کے اقدامات کی طرف بڑھیں تاکہ اعلیٰ سطحی باضابطہ مذاکرات کی راہ ہموار ہو سکے۔

ذرائع کے مطابق، پاکستان کے لیفٹیننٹ جنرل عاصم ملک اور بھارت کے نیشنل سیکیورٹی ایڈوائزر اجیت ڈوول کے درمیان ملاقات کی بھی توقع ہے، جس میں ممکنہ حکمت عملی طے کی جا سکتی ہے جو دوبارہ جامع مذاکرات کے آغاز کا ذریعہ بنے گی۔ گزشتہ دنوں بھی ڈی جی ایم اوز کے درمیان دو بار رابطے ہو چکے ہیں، جن میں مکمل جنگ بندی اور تمام فوجی کارروائیاں روکنے پر اتفاق کیا گیا تھا۔ سیکیورٹی ذرائع کے مطابق، ان رابطوں سے دونوں ممالک کے درمیان براہ راست مذاکرات کی راہ ہموار ہو رہی ہے، اور ممکنہ طور پر یہ مذاکرات کسی تیسرے ملک، جیسے سعودی عرب، میں بھی ہو سکتے ہیں۔