news
بھارت سے جنگ کے دوران مزید 2 پاکستانی جوان شہید، شہداء کی تعداد 13 ہوگئی، آئی ایس پی آر
پاکستان اور بھارت کے درمیان جاری کشیدگی کے دوران پاک فوج کے مزید دو زخمی جوان شہادت کے مقام پر فائز ہو گئے، جس کے بعد مسلح افواج کے شہداء کی مجموعی تعداد 13 ہو گئی ہے۔ آئی ایس پی آر کے مطابق بھارتی افواج نے 6 اور 7 مئی کی درمیانی شب خواتین، بچوں اور بزرگوں کو نشانہ بناتے ہوئے بزدلانہ حملے کیے، جن کے نتیجے میں 40 بے گناہ شہری شہید ہوئے، جن میں 7 خواتین اور 15 بچے شامل ہیں، جبکہ 121 شہری زخمی بھی ہوئے۔
شہداء میں پاک فوج کے حوالدار محمد نوید اور پاک فضائیہ کے سینئر ٹیکنیشن محمد ایاز شامل ہیں، جنہوں نے فرض کی ادائیگی کے دوران اپنی جانیں قربان کر کے حب الوطنی کی اعلیٰ مثال قائم کی۔ افواج پاکستان نے شہداء کو خراجِ عقیدت پیش کیا اور زخمیوں کی جلد صحت یابی کے لیے دعا کی۔
صدرِ مملکت آصف علی زرداری اور وزیراعظم شہباز شریف نے شہداء کو “معرکۂ حق” کے جانباز قرار دیتے ہوئے کہا کہ ملکی سلامتی اور خودمختاری کے دفاع میں دی گئی قربانیاں قوم کے لیے باعثِ فخر ہیں، اور پوری قوم ان بہادر سپوتوں کو سلام پیش کرتی ہے۔