پاک فضائیہ کی کامیابی پر ڈیلی میل کی رپورٹ: جے 10سی نے رافیل کو شکست دی

برطانوی اخبار ڈیلی میل نے پاک فضائیہ کی حالیہ عسکری کارروائی “آپریشن بُنیانٌ مَّرْصُوْص” کی شاندار کامیابیوں پر تفصیلی رپورٹ شائع کی ہے، جس میں پاکستان کی فضائی طاقت کو سراہتے ہوئے بتایا گیا کہ پاک فضائیہ نے بھارت کی جدید ترین فضائیہ، بالخصوص رافیل طیاروں کو مؤثر طریقے سے شکست دی۔ رپورٹ میں اس بات کو نمایاں کیا گیا کہ چین کے تیار کردہ جنگی طیارے جے 10سی نے مغربی ٹیکنالوجی، بالخصوص فرانسیسی ساختہ رافیل، کا کامیابی سے مقابلہ کیا۔

ایئر وائس مارشل اورنگزیب احمد نے آپریشن کی تفصیلات بتاتے ہوئے کہا کہ بھارت کی جانب سے کیے گئے تمام ڈرون اور میزائل حملے بروقت ناکام بنائے گئے، جن میں براہموس میزائل بھی شامل تھے۔ پاکستان نے 0-6 کی واضح برتری حاصل کرتے ہوئے بھارت کے 26 سے زائد اہم فوجی اور لاجسٹک اہداف کو کامیابی سے نشانہ بنایا، جن میں ایس-400 سسٹم، فیلڈ ڈیپوز، ریڈار سسٹمز، اور بریگیڈ ہیڈکوارٹرز شامل تھے۔

پاک فوج کے ترجمان لیفٹیننٹ جنرل احمد شریف چوہدری نے کہا کہ دشمن موت سے ڈرتا ہے جبکہ ہمارے سپاہی شہادت سے محبت کرتے ہیں۔ انہوں نے یہ بھی واضح کیا کہ پاکستانی تحویل میں کوئی بھارتی پائلٹ نہیں اور بھارتی میڈیا کی یہ خبر جھوٹ پر مبنی ہے۔ اس عالمی سطح کی رپورٹ نے نہ صرف پاکستان کی دفاعی مہارت کا اعتراف کیا بلکہ خطے میں طاقت کا توازن بھی واضح کر دیا۔