news
ویرات کوہلی کا ٹیسٹ کرکٹ سے ریٹائرمنٹ کا اعلان، انوشکا شرما کا جذباتی ردعمل
بھارتی کرکٹ اسٹار ویرات کوہلی نے اپنے 14 سالہ شاندار کیریئر کے بعد ٹیسٹ کرکٹ سے ریٹائرمنٹ کا اعلان کر دیا ہے، جس پر اُن کے مداحوں میں افسردگی کی لہر دوڑ گئی۔ اس موقع پر ان کی اہلیہ اور معروف اداکارہ انوشکا شرما نے سوشل میڈیا پر ایک جذباتی پیغام شیئر کرتے ہوئے ویرات کو خراج تحسین پیش کیا۔ انہوں نے ویرات کی ایک پرانی ٹیسٹ میچ کی تصویر شیئر کرتے ہوئے لکھا کہ لوگ تمہارے ریکارڈز اور کامیابیاں یاد رکھیں گے، لیکن مجھے وہ آنسو یاد رہیں گے جو تم نے کبھی کسی کے سامنے نہیں دکھائے، وہ لڑائیاں جو کسی نے نہیں دیکھیں، اور اس فارمیٹ سے تمہاری بے پناہ محبت۔ انوشکا نے مزید لکھا کہ ہر ٹیسٹ سیریز کے بعد تم میں جو سیکھنے کی لگن، عاجزی اور پختگی آئی، اسے دیکھنا میرے لیے اعزاز تھا۔ ویرات کوہلی نے اعلان کرتے ہوئے کہا کہ ٹیسٹ کرکٹ نے انہیں وہ سبق سکھائے جو عمر بھر ان کے ساتھ رہیں گے۔ یاد رہے کہ ویرات نے 123 ٹیسٹ میچز میں 9,230 رنز بنائے، جن میں 30 سنچریاں شامل ہیں، اور وہ بھارت کے سب سے کامیاب ٹیسٹ کپتان بھی رہے ہیں، جنہوں نے 68 میچز میں سے 40 میں ٹیم کو فتح دلائی۔