سوناکشی سنہا کی بھارتی میڈیا پر تنقید: خوف و ہراس پھیلانا بند کریں

ممبئی – پاکستان اور بھارت کے درمیان حالیہ کشیدگی کے دوران جہاں میڈیا جنگی بیانیے کو ہوا دے رہا ہے، وہیں بالی ووڈ اداکارہ سوناکشی سنہا نے غیر ذمہ دارانہ رپورٹنگ پر شدید تنقید کی ہے۔ سوشل میڈیا پر جاری اپنے بیان میں سوناکشی نے بھارتی نیوز چینلز کو “مذاق” قرار دیتے ہوئے کہا کہ وہ مبالغہ آرائی اور چیخ و پکار کے ذریعے عوام میں خوف و ہراس پھیلا رہے ہیں۔

سوناکشی سنہا نے کہا: “ہمارے نیوز چینلز ایک ڈرامہ بن چکے ہیں۔ جو کچھ وہ دکھا رہے ہیں، وہ ایسا ہے کہ دماغ گھوم جائے۔ آخر یہ سب کیا ہو رہا ہے؟ میڈیا کو چاہیے کہ وہ صرف سچ دکھائے، نہ کہ جنگ کو سنسنی خیز بنا کر خوف پیدا کرے۔”

اداکارہ نے عوام کو بھی مشورہ دیا کہ وہ صرف قابلِ بھروسا ذرائع سے خبریں حاصل کریں اور جھوٹی و مبالغہ آمیز رپورٹنگ سے بچیں۔ انہوں نے کہا: “آپ لوگ یہ کچرا دیکھنا بند کریں جو یہ الٹے سیدھے نیوز چینلز دکھا رہے ہیں۔”

سوناکشی نے اپنے بیان میں بھارتی وزارتِ دفاع کی وہ ہدایت بھی شامل کی جس میں میڈیا کو جنگی محاذ پر جاری کارروائیوں کی لائیو رپورٹنگ سے باز رہنے کی تنبیہ کی گئی ہے۔ وزارت دفاع کے مطابق ایسی رپورٹنگ نہ صرف آپریشنز کے لیے نقصان دہ ہے بلکہ فوجیوں کی جان کو بھی خطرے میں ڈال سکتی ہے۔

اداکارہ کی اس جرات مندانہ رائے کو سوشل میڈیا پر ملا جلا ردعمل ملا ہے۔ کئی صارفین نے انہیں سچ بولنے پر سراہا، جب کہ بعض نے تنقید کرتے ہوئے انہیں “غدار” قرار دیا۔