انور مقصود کا اظہارِ یکجہتی: مشکل وقت میں فوج کی اہمیت سمجھ آتی ہے

اسلام آباد: معروف مزاح نگار، دانشور اور لکھاری انور مقصود نے پاک بھارت حالیہ کشیدگی کے تناظر میں آرٹس کونسل کراچی میں ایک پریس کانفرنس کے دوران کہا ہے کہ مشکل حالات میں قوم کو اندازہ ہوتا ہے کہ فوج کیوں ضروری ہے۔ انہوں نے کہا کہ اس وقت پورا ملک ایک سپاہی کی مانند کھڑا ہے، اور میرے پاس ہتھیار نہیں، قلم ہے، جو میں اپنے وطن کے دفاع میں استعمال کرتا ہوں۔

انور مقصود کا کہنا تھا کہ جنگ شروع کرنا آسان، مگر ختم کرنا نہایت مشکل ہوتا ہے۔ اگرچہ بھارت کے 5 طیارے گرائے گئے، اس پر فخر کم اور معصوم جانوں کے ضیاع پر افسوس زیادہ ہے۔ انہوں نے بھارتی میڈیا کو متعصب قرار دیتے ہوئے کہا کہ وہ کبھی بھی حقیقت نہیں دکھا سکتا۔

انہوں نے وزیراعظم نریندر مودی پر تنقید کرتے ہوئے کہا کہ انہیں شاید اب یہ سمجھ آجائے کہ مسلمانوں سے دشمنی کا رویہ درست نہیں۔ ان کا کہنا تھا کہ پوری قوم کی خواہش ہے کہ ملک ترقی کرے اور امن قائم ہو، اور ہمیں وہی راہ اپنانی چاہیے جس پر ہماری حکومت اور افواجِ پاکستان ہمیں لے جانا چاہتی ہیں۔

پریس کانفرنس کے دوران معروف شاعر افتخار عارف نے بھی ویڈیو لنک پر بات کرتے ہوئے کہا کہ انسانی جان کی قدر ہر جگہ یکساں ہے، اور ہم پہلگام واقعے کی غیر جانبدارانہ تحقیقات کا مطالبہ کرتے ہیں۔ ان کا کہنا تھا کہ بھارت ہر بار بغیر ثبوت پاکستان پر الزام دھر دیتا ہے، مگر پاکستان اپنی خودمختاری پر کسی قسم کا سمجھوتہ نہیں کرے گا۔