پاکستان نے چینی J-10 طیاروں سے 2 بھارتی جنگی طیارے مار گرائے، امریکی تصدیق

اسلام آباد: پاک فضائیہ کی حالیہ کارروائی میں بھارتی فضائیہ کو بھاری نقصان اٹھانا پڑا، جہاں پاکستان نے چینی ساختہ “جے 10” جنگی طیاروں کے ذریعے بھارت کے دو طیارے مار گرائے، جن میں سے ایک فرانسیسی ساختہ جدید جنگی طیارہ رافیل بھی شامل ہے۔ اس بات کی تصدیق اب نہ صرف فرانسیسی بلکہ امریکی حکام نے بھی کر دی ہے۔

غیر ملکی خبر رساں ادارے سے گفتگو کرتے ہوئے دو امریکی حکام نے انکشاف کیا کہ پاکستان نے بھارتی جنگی طیاروں پر فضا سے فضا میں مار کرنے والے میزائلوں کا استعمال کرتے ہوئے “جے 10” طیاروں کے ذریعے یہ کارروائی کی۔ ان کا کہنا تھا کہ شواہد کے مطابق کم از کم دو بھارتی جنگی طیارے تباہ کیے گئے۔

یہ پہلا موقع ہے جب کسی لڑائی میں فرانسیسی ساختہ رافیل طیارہ تباہ ہوا۔ سی این این نے بھی اس واقعے کی تصدیق کرتے ہوئے رپورٹ کیا کہ ایک فرانسیسی انٹیلیجنس افسر نے بتایا ہے کہ بھارت کا رافیل طیارہ پاک فضائیہ کے حملے میں تباہ ہوا، اور یہ سنگین جھٹکا بھارت کے دفاعی بیانیے کے لیے باعثِ خفت بنا ہوا ہے۔

ادھر بی بی سی نے اپنی رپورٹ میں یہ بھی بتایا ہے کہ حالیہ فضائی جھڑپ میں بھارت کے کم از کم 3 جنگی طیارے تباہ کیے گئے، جس میں مزید تفصیلات کا جائزہ لیا جا رہا ہے۔

امریکی حکام کے مطابق یہ کامیابی پاکستان اور چین کے دفاعی تعاون کی ایک بڑی مثال ہے، خاص طور پر “جے 10” طیارے کی کارکردگی نے چین کے جنگی طیارہ ساز پروگرام کے لیے بھی عالمی سطح پر ایک مثبت تاثر قائم کیا ہے۔