لاہور، راولپنڈی سمیت ملک بھر میں بھارتی ڈرون حملے، پاک فوج کی جوابی کارروائی

لاہور: پاکستان کے مختلف شہروں میں بھارتی ڈرون حملوں کا سلسلہ جاری ہے۔ سکیورٹی ذرائع کے مطابق، لاہور کے والٹن ایئرپورٹ، برکی اور قریبی علاقوں میں مزید تین بھارتی ڈرونز کو پاک فوج نے بروقت کارروائی کرتے ہوئے تباہ کر دیا۔ ڈرونز کے گرنے کے بعد علاقے میں فائرنگ اور سائرن کی آوازیں سنائی دیں، جس سے شہریوں میں خوف و ہراس پھیل گیا۔

اسی طرح راولپنڈی کے ریس کورس اور فوڈ اسٹریٹ کے قریب بھی دو بھارتی ڈرونز مار گرائے گئے۔ فوڈ اسٹریٹ میں ایک ڈرون کے گرنے سے ایک شہری شدید زخمی ہوا اور قریبی دکان کو آگ لگ گئی، جس سے املاک کو نقصان پہنچا۔ قانون نافذ کرنے والے اداروں نے موقع پر پہنچ کر علاقے کو گھیرے میں لے لیا اور شواہد اکٹھے کر لیے۔

لاہور ایئرپورٹ کے قریب گرایا گیا ڈرون 5 سے 6 فٹ لمبا تھا اور حساس تنصیبات کی جاسوسی کے لیے استعمال ہو رہا تھا۔ اسے سسٹم جام کر کے زمین پر گرایا گیا، جہاں ایک زور دار دھماکہ ہوا، تاہم کسی بڑے جانی نقصان کی اطلاع نہیں ملی۔

دوسری جانب سندھ کے ضلع گھوٹکی میں بھارتی ڈرون گرنے سے ایک کسان شہید اور دو افراد شدید زخمی ہو گئے۔ واقعے کے بعد سکیورٹی فورسز نے ڈرون کے ملبے کو قبضے میں لے کر تحقیقات شروع کر دی ہیں۔

چکوال، شیخوپورہ، گجرات اور کراچی میں بھی بھارتی ڈرون گرنے کے واقعات پیش آئے۔ چکوال کے دیوالیاں گاؤں میں گرنے والے ڈرون سے کوئی جانی نقصان نہیں ہوا، لیکن اس کی بھارتی ساخت کی تصدیق ہوئی ہے۔ شیخوپورہ اور گجرات میں گرنے والے ڈرونز کے ٹکڑے مختلف جگہوں پر گرے، تاہم خوش قسمتی سے کوئی جانی نقصان نہیں ہوا۔ کراچی کے علاقے شرافی گوٹھ میں گرنے والے ڈرون پر بھی سکیورٹی ادارے کارروائی کر چکے ہیں۔

ڈی جی آئی ایس پی آر کے مطابق، پاکستان کی مسلح افواج مکمل چوکنا ہیں اور دشمن کی ہر جارحیت کا بھرپور جواب دیا جا رہا ہے۔