بھارت کی ڈرون جارحیت: پاک فوج کے 4 جوان زخمی، سندھ میں 1 شہری شہید

0راولپنڈی: ڈی جی آئی ایس پی آر لیفٹیننٹ جنرل احمد شریف نے میڈیا بریفنگ میں انکشاف کیا ہے کہ بھارت نے 7 اور 8 مئی کی درمیانی شب ایک بار پھر جارحیت کا مظاہرہ کرتے ہوئے پاکستان کے مختلف شہروں میں ڈرونز بھیجے۔ ان حملوں کے دوران لاہور میں ایک ڈرون گرنے سے پاک فوج کے چار اہلکار زخمی ہوئے، جب کہ سندھ کے ضلع گھوٹکی میں ایک کسان شہید اور دو افراد شدید زخمی ہو گئے۔

انہوں نے بتایا کہ بھارت کی جانب سے لاہور، گوجرانوالہ، چکوال، راولپنڈی، اٹک، بہاولپور، میانو، چھور، کراچی اور دیگر علاقوں میں ڈرون بھیجے گئے جنہیں پاک فوج نے کامیابی سے مار گرایا۔ متعدد ڈرون جاسوسی کے علاوہ دھماکہ خیز مواد سے بھی لیس تھے۔ لاہور ایئرپورٹ کے قریب گرایا گیا ایک ڈرون حساس تنصیبات کی نگرانی کر رہا تھا، جسے سسٹم جام کر کے نیچے گرایا گیا۔ دھماکے سے ارد گرد کے علاقے میں خوف و ہراس پھیل گیا۔

چکوال کے علاقے دیوالیاں، شیخوپورہ کے باہومان، گجرات کے پیر جنڈ، اور کراچی کے ملیر شرافی گوٹھ میں بھی بھارتی ڈرون مار گرائے گئے۔ گجرات میں ایک ڈرون کا حصہ ایک شہری کے گھر میں جا گرا لیکن خوش قسمتی سے جانی نقصان نہیں ہوا۔

ڈی جی آئی ایس پی آر کا کہنا تھا کہ بھارتی جارحیت کی ہر حرکت کا موثر جواب دیا جائے گا، اور پاکستانی خودمختاری کے تحفظ پر کوئی سمجھوتہ نہیں کیا جائے گا۔ تمام مقامات پر سیکیورٹی ادارے ملبہ قبضے میں لے کر تحقیقات کر رہے ہیں۔