news
ایکسچینج ایسوسی ایشن: جنگی حالات میں حکومت کو 1 ارب ڈالر دینے کی صلاحیت
ایکسچینج ایسوسی ایشن آف پاکستان کے چیئرمین ملک بوستان نے پاک بھارت کشیدگی کے دوران معاشی استحکام پر اعتماد کا اظہار کرتے ہوئے کہا ہے کہ جنگی حالات میں بھی حکومت کو 1 ارب ڈالر فراہم کرنے کی صلاحیت رکھتے ہیں۔
ایکسچینج ایسوسی ایشن آف پاکستان کے چیئرمین کا کہنا تھا کہ حالیہ کشیدگی کے باوجود امریکی ڈالر کی قیمت میں کوئی اضافہ نہیں ہوا، جو ملکی معیشت کی مضبوطی کی علامت ہے۔
ملک بوستان کے مطابق، اسٹیٹ بینک نے گزشتہ دو سال میں ایکسچینج ریٹ کو مستحکم رکھنے کے لیے 9 ارب ڈالر خریدے، جبکہ ایکسچینج کمپنیوں نے گزشتہ سال انٹربینک مارکیٹ کو 6 ارب ڈالر فراہم کیے۔
انہوں نے کہا کہ اگر حکومت اقدامات کرے تو ترسیلات زر کو ماہانہ 4 ارب سے بڑھا کر 8 ارب ڈالر تک لے جایا جا سکتا ہے۔
ڈالر کی اصل قیمت 250 روپے بتاتے ہوئے انہوں نے کہا کہ یہ آئی ایم ایف کے دباؤ اور برآمد کنندگان کے مفادات کی وجہ سے نیچے نہیں آ رہی۔
ملک بوستان نے مزید کہا کہ جلد ایکسچینج کمپنیوں کو پی آر آئی سسٹم سے منسلک کر دیا جائے گا، اور یہ کمپنیاں روزانہ انٹربینک مارکیٹ کو 20 سے 25 کروڑ ڈالر فراہم کر رہی ہیں