پاکستان کا زبردست جواب: بھارتی بٹالین اور بریگیڈ ہیڈکوارٹر تباہ، بھارتی فوج کا چورا کمپلیکس پر سفید جھنڈا

پاکستانی سیکیورٹی ذرائع کے مطابق پاک فوج نے بھارتی جارحیت کا مؤثر اور فوری جواب دیتے ہوئے دشمن کے اہم فوجی مراکز کو نشانہ بنایا ہے۔ جوابی کارروائی کے دوران پاک فوج نے مقبوضہ کشمیر میں واقع بھارتی 6 مہار بٹالین ہیڈکوارٹر کو تباہ کر دیا جو آزاد کشمیر کی وادی لیپا کے سامنے موجود تھا۔ اس کے ساتھ ہی بھارتی فوج کا 12 انفنٹری بریگیڈ ہیڈکوارٹر بھی نشانہ بنایا گیا، جو بھارتی 9 ڈویژن اور 15 کور کے زیر کمان تھا۔

بھارت کی جانب سے 6 مختلف مقامات پر میزائل حملوں کے بعد پاکستان نے دفاعی کارروائی کے دوران دشمن کے 5 جنگی طیارے مار گرائے، جن میں 3 رافیل، ایک مگ 29 اور ایک ایس یو 30 شامل ہیں۔ ایک بھارتی طیارہ بھا ٹنڈا، دوسرا اکھنور اور تیسرا اونتی پورہ کے قریب گر کر تباہ ہوا۔ برنالہ سیکٹر میں ایک بھارتی ڈرون بھی مار گرایا گیا۔

لائن آف کنٹرول پر بھی پاکستان کی بھرپور کارروائی جاری ہے۔ جولی اور بڈوری سیکٹرز میں دشمن کی پوسٹوں پر شدید حملے کیے گئے جس کے باعث بھارتی فوجی 50 چیک پوسٹس چھوڑ کر فرار ہو گئے۔ پیر کانٹی سیکٹر میں بھی بھارتی فوج نے 40 پوسٹس خالی کر دیں۔ پانڈو سیکٹر میں “جنگل 1” نامی بھارتی چیک پوسٹ مکمل طور پر تباہ کر دی گئی، جہاں شدید دھواں اٹھتا دیکھا گیا۔

پاکستانی افواج کی بھرپور کارروائیوں کے بعد بھارت کو شکست تسلیم کرنا پڑی۔ لائن آف کنٹرول کے چورا کمپلیکس میں بھارتی فوج نے سفید جھنڈا لہرا کر پسپائی کا عملی اعلان کر دیا۔ پاک فوج نے ایک بار پھر ثابت کر دیا کہ وہ کسی بھی جارحیت کا مؤثر اور منہ توڑ جواب دینے کی مکمل صلاحیت رکھتی ہے