مائیکروسافٹ نے اسکائپ کو باضابطہ طور پر ختم کر دیا

مائیکروسافٹ نے آج سے اپنے مشہور سوشل میڈیا اور ویڈیو چیٹنگ پلیٹ فارم ’اسکائپ‘ کو باضابطہ طور پر ختم کر دیا ہے۔ میڈیا رپورٹس کے مطابق مائیکروسافٹ نے اس فیصلے کا اعلان رواں سال فروری میں کیا تھا، جس کے تحت اسکائپ کی جگہ اب ’مائیکروسافٹ ٹیمز‘ کو مرکزی ویڈیو کمیونیکیشن پلیٹ فارم کے طور پر استعمال کیا جائے گا۔

اسکائپ کے صارفین کو اب ’ٹیمز‘ پر منتقل کیا جا رہا ہے، جو حالیہ برسوں میں مائیکروسافٹ کی کانفرنس کال اور آن لائن میٹنگز کے لیے اولین ترجیح بن چکی ہے۔ مائیکروسافٹ 365 کے صدر، جیف ٹیپر نے اس موقع پر کہا کہ اسکائپ سے حاصل ہونے والے تجربات نے کمپنی کو ’ٹیمز‘ جیسی پیشہ ورانہ اور جدید سروس تیار کرنے میں مدد دی۔ ان کا کہنا تھا کہ ایک مربوط اور بہتر ویڈیو کال سروس فراہم کرنے کے لیے صرف ایک پلیٹ فارم پر توجہ مرکوز کرنا زیادہ مؤثر ثابت ہوگا۔

واضح رہے کہ اسکائپ کی ابتدا 2003 میں ایسٹونیا میں نکلاس زینسٹروم اور جانس فریس نے کی تھی۔ بعد ازاں 2005 میں ای-بے نے اسکائپ کو خریدا، جس نے بعد میں یہ پلیٹ فارم مائیکروسافٹ کو فروخت کر دیا۔ اسکائپ ایک طویل عرصے تک دنیا بھر میں ویڈیو اور آڈیو کالز کے لیے مقبول ترین پلیٹ فارمز میں شامل رہا، لیکن اب اسے ٹیکنالوجی کی تیزی سے بدلتی ضروریات کے پیش نظر تاریخ کا حصہ بنا دیا گیا ہے۔