پاکستان کا الفتح میزائل کا کامیاب تجربہ، دفاعی صلاحیتوں میں اہم پیش رفت

پاکستان نے زمین سے زمین پر مار کرنے والے الفتح میزائل کا کامیاب تربیتی تجربہ کرلیا ہے۔ پاک فوج کے شعبہ تعلقات عامہ (آئی ایس پی آر) کے مطابق یہ تجربہ جاری مشق “ایکس انڈس” کا حصہ تھا، جس میں 120 کلومیٹر تک مار کرنے والے جدید میزائل سسٹم کی کارکردگی اور تکنیکی صلاحیتوں کو جانچا گیا۔

آئی ایس پی آر کا کہنا ہے کہ اس تجربے کا مقصد نہ صرف پاک فوج کی آپریشنل تیاری کو یقینی بنانا تھا بلکہ میزائل کے جدید نیویگیشن سسٹم اور بہتر درستگی جیسے اہم تکنیکی پہلوؤں کی توثیق بھی کرنا تھا۔ تجربے کا مشاہدہ پاک فوج کے سینئر افسران، اسٹریٹجک اداروں کے سائنسدانوں اور انجینئرز نے کیا۔

چیئرمین جوائنٹ چیفس آف اسٹاف کمیٹی اور چیف آف آرمی اسٹاف نے کامیاب تجربے پر تمام شریک افسران، سائنسدانوں اور انجینئرز کو مبارکباد دی اور پاکستان کی علاقائی سالمیت کے تحفظ کے لیے پاک فوج کی آپریشنل تیاریوں اور تکنیکی مہارت پر مکمل اعتماد کا اظہار کیا۔

اس سے قبل بھی پاکستان ابدالی ویپن سسٹم سمیت کئی جدید میزائلوں کے کامیاب تجربات کر چکا ہے جن کا مقصد مسلح افواج کی حربی تیاریوں کو جانچنا اور دفاعی صلاحیتوں میں بہتری لانا ہے۔ ابدالی میزائل کے تجربے کا مشاہدہ بھی سٹریٹجک اداروں کے ماہرین اور اعلیٰ فوجی حکام نے کیا تھا۔

صدر مملکت، وزیر اعظم، چیئرمین جوائنٹ چیفس آف اسٹاف کمیٹی اور تمام مسلح افواج کے سربراہان نے کامیاب تجربے پر اطمینان کا اظہار کرتے ہوئے ٹیم کو مبارکباد دی اور کہا کہ پاکستان کی دفاعی صلاحیتیں ملکی سلامتی کی ضامن ہیں۔