عطاءاللہ تارڑ کا ایل او سی دورہ: بھارتی پروپیگنڈے کی حقیقت عالمی میڈیا کے سامنے بے نقاب

وفاقی وزیر اطلاعات عطاءاللہ تارڑ نے ملکی و غیر ملکی میڈیا کے ہمراہ لائن آف کنٹرول (ایل او سی) کا دورہ کیا، جس کا مقصد بھارت کی جانب سے پھیلائے گئے جھوٹے اور بے بنیاد پروپیگنڈے کو بے نقاب کرنا تھا۔ اس دورے کے دوران میڈیا نمائندوں کو ان مقامات پر لے جایا گیا جنہیں بھارت کی جانب سے مبینہ دہشت گردی کے ٹھکانے قرار دیا گیا تھا۔

وفاقی وزیر نے میڈیا کے سامنے زمینی حقائق پیش کیے، جہاں مقامی آبادی نے بھی بھارت کے دعووں کو جھوٹا قرار دیا اور حالات کا خود مشاہدہ کرنے کے بعد صحافیوں نے ان بھارتی الزامات کی حقیقت خود جان لی۔

اس موقع پر عطاءاللہ تارڑ نے کہا کہ پاکستان ایک ذمہ دار ریاست ہے جو نہ صرف علاقائی بلکہ عالمی امن کے لیے بھی پرعزم ہے۔ انہوں نے واضح کیا کہ پاکستان دنیا کے کسی بھی حصے میں دہشتگردی اور دہشتگردانہ سرگرمیوں کی سختی سے مذمت کرتا ہے۔

انہوں نے کہا کہ بھارت کی جانب سے پاکستان پر بارہا جھوٹے الزامات لگائے گئے ہیں لیکن آج ہم نے عالمی میڈیا کے سامنے تمام حقائق رکھ دیے ہیں۔ جن جگہوں کو بھارت دہشت گرد کیمپس قرار دیتا ہے، وہ دراصل عام شہریوں کی آبادیاں ہیں۔

عطاءاللہ تارڑ نے مزید کہا کہ پاکستان نے ہمیشہ اپنے عمل سے امن کی حمایت کا ثبوت دیا ہے، لیکن اپنی خودمختاری کے تحفظ کے لیے ہم کسی بھی حد تک جا سکتے ہیں۔ بھارت کو چاہیے کہ وہ پاکستان پر الزام تراشی سے پہلے مقبوضہ کشمیر میں انسانی حقوق کی سنگین خلاف ورزیوں پر توجہ دے۔

انہوں نے کہا کہ بھارت داخلی ناکامیوں کو چھپانے کے لیے ایل او سی پر جھوٹا پروپیگنڈہ کرتا ہے، لیکن آج عالمی میڈیا نے اپنی آنکھوں سے اصل حقیقت دیکھ لی ہے۔ پاکستان نے ایک بار پھر دنیا پر واضح کر دیا ہے کہ وہ علاقائی امن کے لیے سنجیدہ ہے، لیکن کسی بھی بھارتی جارحیت کا فوری اور منہ توڑ جواب دیا جائے گا۔