عمر ایوب کا بھارت کو سخت پیغام: پی ٹی آئی کارکنوں پر تشدد، ایٹمی جواب اور عبوری ضمانت پر ردعمل

اسلام آباد: پاکستان تحریک انصاف کے رہنما اور قومی اسمبلی میں اپوزیشن لیڈر عمر ایوب نے حکومت اور اس کی پالیسیوں پر شدید تنقید کرتے ہوئے کہا ہے کہ جو لوگ پی ٹی آئی ورکرز کے گھروں میں گھس کر توڑ پھوڑ کرتے رہے، وہ اب مکمل تربیت یافتہ ہو چکے ہوں گے، اور امید ہے کہ اب وہ ویگو ڈالوں پر بم اور بارود لاد کر بھارت کے ٹینکوں سے ٹکرائیں گے تاکہ دکھا سکیں کہ وہ کتنے بہادر ہیں۔

میڈیا سے گفتگو کرتے ہوئے عمر ایوب نے کہا کہ عمران خان نے بھارت کو للکارا اور دوٹوک الفاظ میں کہا تھا کہ “ہم حملہ پہلے کریں گے اور سوچیں گے بعد میں”، جبکہ شہباز شریف نے انڈیا کے سامنے جھکنے کا مظاہرہ کیا اور مقبوضہ کشمیر میں حالیہ حملے کے بعد فوری اعلان کر دیا کہ پاکستان اس واقعے میں ملوث نہیں۔ عمر ایوب نے کہا کہ بھارت جنگی مشقیں کر رہا ہے لیکن ہماری حکومت کی زبان پر واضح پیغام تک نہیں۔ انہوں نے زور دیا کہ اگر بھارت نے کسی بھی پاکستانی علاقے پر حملہ کیا تو بھرپور اور ایٹمی صلاحیت کے ساتھ جواب دیا جائے گا، اور دشمن کے جنگی جہازوں کو تباہ کر دیا جائے گا۔

انہوں نے مزید کہا کہ ملک میں موجودہ صورتحال انتہائی افسوسناک ہے جہاں محب وطن شہریوں کے خلاف مقدمات قائم کیے جا رہے ہیں، عمران خان، بشریٰ بی بی، شاہ محمود قریشی، ڈاکٹر یاسمین راشد، میاں محمود الرشید، اعجاز چوہدری، عمر سرفراز چیمہ اور سالار خان کاکڑ جیسے سیاسی رہنما محض اس لیے جیلوں میں ہیں کہ انہوں نے پاکستان، آئین اور جمہوریت کے حق میں آواز بلند کی۔

عمر ایوب نے یہ انکشاف بھی کیا کہ پاکستان نے یوکرائن کو 85 کروڑ ڈالر کے گولہ بارود اور شیل فراہم کیے ہیں، مگر وزارت دفاع اس پر جواب دینے سے انکار کر رہی ہے اور اسے خفیہ معاملہ قرار دے رہی ہے، حالانکہ یہ بات دنیا بھر کو معلوم ہو چکی ہے۔

ادھر انسداد دہشت گردی عدالت لاہور میں جناح ہاؤس اور دیگر جلاؤ گھیراؤ کے مقدمات کی سماعت ہوئی جس میں عمر ایوب اور حافظ فرحت عباس کی عبوری ضمانتوں پر سماعت کی گئی۔ جج منظر علی گل نے سماعت کے دوران پراسیکیوٹر سے استفسار کیا کہ کیا تفتیش مکمل ہو چکی ہے؟ وکیلِ صفائی نے مؤقف اپنایا کہ وہ متعدد بار تفتیش میں شامل ہو چکے ہیں۔ عدالت نے عبوری ضمانت میں 26 مئی تک توسیع دیتے ہوئے مقدمے کا مکمل ریکارڈ طلب کر لیا ہے۔