news
پاکستان کا ابدالی میزائل کا کامیاب تجربہ، 450 کلومیٹر تک ہدف کو نشانہ بنانے کی صلاحیت
راولپنڈی:
پاکستان نے زمین سے زمین تک مار کرنے والے ابدالی ویپن سسٹم کا کامیاب تجربہ کر لیا ہے۔ پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق یہ تجربہ ایک تربیتی مشق “انڈس” کا حصہ تھا، جس کا مقصد افواج کی عملی تیاری اور میزائل کے اہم تکنیکی پہلوؤں کا جائزہ لینا تھا۔
آئی ایس پی آر کے مطابق، ابدالی میزائل کی رینج 450 کلومیٹر ہے اور یہ زمین سے زمین تک درست نشانہ لگانے کی صلاحیت رکھتا ہے۔ اس تجربے کے دوران جدید نیویگیشن سسٹم اور بہتر سمت تبدیل کرنے کی صلاحیت کو بھی جانچا گیا۔
تجربے کا مشاہدہ کمانڈر آرمی اسٹریٹجک فورسز کمانڈ، اسٹریٹجک پلانز ڈویژن، سینئر فوجی افسران، اور پاکستان کے اسٹریٹجک اداروں کے سائنسدانوں و انجینئروں نے کیا۔
بیان میں کہا گیا ہے کہ یہ تجربہ پاکستان کی اسٹریٹجک فورسز کی عملی تیاری اور تکنیکی مہارت پر مکمل اعتماد کا مظہر ہے اور یہ پاکستان کی قومی سلامتی کے تحفظ اور موثر دفاعی صلاحیت کا ثبوت فراہم کرتا ہے۔
صدرِ مملکت، وزیر اعظم، چیئرمین جوائنٹ چیفس آف اسٹاف کمیٹی اور مسلح افواج کے سربراہان نے اس کامیاب تجربے پر تمام متعلقہ افسران، سائنسدانوں اور انجینئروں کو مبارکباد پیش کی ہے۔