news
اسپیس ایکس نے 28 وی ٹو سیٹلائٹس کامیابی سے زمین کے نچلے مدار میں روانہ کر دیں
کیپ کیناویرل (فلوریڈا):
اسپیس ایکس نے کیپ کیناویرل اسپیس فورس اسٹیشن سے 28 وی ٹو انٹرنیٹ سیٹلائٹس کو کامیابی سے زمین کے نچلے مدار (Low Earth Orbit) میں روانہ کر دیا ہے۔
میڈیا رپورٹس کے مطابق، یہ 28 نئے سیٹلائٹس پہلے سے مدار میں موجود تقریباً 7,300 سیٹلائٹس میں تازہ اضافہ ہیں جو اسپیس ایکس کے اسٹارلنک انٹرنیٹ منصوبے کا حصہ ہیں۔
یہ مشن اسپیس ایکس کے فالکن 9 راکٹ کے ذریعے شام 6:51 بجے لانچ کیا گیا۔ راکٹ کا پہلا مرحلہ (فیول بوسٹر) لانچ کے تقریباً ساڑھے آٹھ منٹ بعد کامیابی سے بحر اوقیانوس میں تعینات ایک ڈرون شپ پر اترا۔
یہ بوسٹر، جس کا ٹیل نمبر 1080 ہے، اس سے قبل 18 مختلف مشنز میں استعمال ہو چکا ہے، جن میں بین الاقوامی خلائی اسٹیشن، دو کارگو مشنز، یورپی خلائی ایجنسی کی یوکلڈ آبزرویٹری اور دو نجی خلا بازوں کے مشن شامل ہیں۔
اسپیس ایکس کی یہ 440ویں مرتبہ تھی جب اس نے ایک دوبارہ قابل استعمال بوسٹر استعمال کیا۔ مجموعی طور پر یہ اسپیس ایکس کا 468 واں مشن تھا، جب کہ یہ سال 2025 کا 51 واں لانچ شمار ہوتا ہے۔