ایف بی آر کا 830 ارب روپے کا ریونیو شارٹ فال، احتجاج شدت اختیار کرگیا

اسلام آباد:
فیڈرل بورڈ آف ریونیو (ایف بی آر) رواں مالی سال 2024-25 کے ابتدائی دس ماہ اور خاص طور پر اپریل 2025 کے دوران ٹیکس وصولیوں کے اہداف حاصل کرنے میں ناکام رہا ہے، جس کے باعث مجموعی ریونیو شارٹ فال 830 ارب روپے تک پہنچ گیا ہے۔

ذرائع کے مطابق اپریل 2025 میں ایف بی آر نے 845 ارب روپے کی عبوری خالص ٹیکس وصولیاں کیں، جو مقررہ ہدف 963 ارب روپے سے 118 ارب روپے کم ہیں۔ اسی طرح مالی سال کے دس ماہ میں مقررہ ہدف 10130 ارب روپے کے مقابلے میں صرف 9300 ارب روپے کے قریب ٹیکس وصول کیا گیا، جس کے نتیجے میں 830 ارب روپے کا شارٹ فال پیدا ہوا۔

ایف بی آر کی کارکردگی پر اس وقت ملازمین کے احتجاج کے اثرات بھی واضح ہونا شروع ہو گئے ہیں۔ ذرائع کا کہنا ہے کہ ادارے میں الاونسز، مراعات اور ریوارڈز کی غیر منصفانہ تقسیم نے ملازمین میں شدید بے چینی پیدا کر دی ہے، جس کے نتیجے میں ملک بھر میں ٹوکن احتجاج کیا جا رہا ہے۔ ایف بی آر کے ملازمین پرفارمنس الاونس کے منجمد ہونے، 140 فیصد الاونس صرف افسران کو دینے اور غیر منصفانہ ریوارڈز رولز کے خلاف سراپا احتجاج ہیں۔

ملازمین کا مؤقف ہے کہ اگر ان کے مطالبات تسلیم نہ کیے گئے تو وہ قلم چھوڑ ہڑتال پر جانے پر مجبور ہوں گے، جس سے ایف بی آر کی پہلے سے کمزور کارکردگی مزید متاثر ہونے کا خدشہ ہے۔ حکومت اور متعلقہ حکام کے لیے یہ صورتحال فوری توجہ کی متقاضی ہے تاکہ نہ صرف ادارے کی کارکردگی کو بحال کیا جا سکے بلکہ ملازمین کے جائز مطالبات کا بھی ازالہ کیا جا سکے۔