ہانیہ عامر کے خلاف بھارتی اداکار کا گھٹیا بیان، مداحوں کا شدید ردعمل

پاکستانی اداکارہ ہانیہ عامر آج کل نہ صرف پاکستان بلکہ بھارت میں بھی اپنے مقبول ڈراموں ’میرے ہمسفر‘ اور ’کبھی میں کبھی تم‘ کی وجہ سے خوب چرچے میں ہیں۔ تاہم ان کی شہرت کا یہ سفر اس وقت ایک ناخوشگوار موڑ پر پہنچ گیا جب ایک بھارتی سی گریڈ اداکار فیضان انصاری نے ان کے خلاف انتہائی گھٹیا اور گستاخانہ زبان استعمال کی، جس پر سوشل میڈیا پر شدید ردعمل سامنے آیا ہے۔

فیضان انصاری نے نہ صرف ہانیہ کو نامناسب اور توہین آمیز القابات سے نوازا بلکہ ان پر بے بنیاد اور غیر مہذب الزامات بھی لگائے۔ یہ واقعہ ایسے وقت میں پیش آیا جب بھارت اور پاکستان کے درمیان کشیدگی عروج پر ہے، اور ہانیہ ایک بار پھر دونوں ممالک کی میڈیا کا مرکزِ توجہ بنی ہوئی ہیں۔

دلچسپ امر یہ ہے کہ بھارتی عوام کی بڑی تعداد نے فیضان انصاری کے اس رویے کو ناپسند کرتے ہوئے سوشل میڈیا پر سخت مذمت کی ہے۔ ایک بھارتی صارف نے لکھا

“ایک خاتون کے بارے میں ایسے شرمناک الفاظ کیسے استعمال کیے جا سکتے ہیں؟”
جبکہ دوسرے نے کہا:
“یہ سب کچھ صرف سستی شہرت حاصل کرنے کے لیے کیا جا رہا ہے۔”

ہانیہ عامر کی مقبولیت کا اندازہ اس بات سے بھی لگایا جا سکتا ہے کہ وہ دیلجیت دوسانجھ کی فلم ’سردار جی 3‘ کا حصہ بننے والی تھیں، مگر پہلگام حملوں کے بعد اس فلم میں ان کے کردار کا مستقبل غیر یقینی صورت اختیار کر چکا ہے۔

اس تمام تنازع کے باوجود ہانیہ کے بھارتی مداح ان کے حق میں آواز بلند کر رہے ہیں، جس سے ظاہر ہوتا ہے کہ فن اور محبت سرحدوں سے بالاتر ہوتے ہیں۔