وزیراعظم شہباز شریف کی پی آئی اے کی نجکاری کی شفافیت پر زور

اسلام آباد:
وزیراعظم شہباز شریف نے پاکستان انٹرنیشنل ایئرلائنز (پی آئی اے) کی نجکاری کے عمل کو مکمل طور پر شفاف بنانے اور سرمایہ کاروں کا اعتماد حاصل کرنے کی ہدایت جاری کر دی ہے۔

وزیراعظم کی زیر صدارت پی آئی اے کی نجکاری سے متعلق اعلیٰ سطحی جائزہ اجلاس منعقد ہوا، جس میں نیلامی کے طریقہ کار، اس کے لیے درکار مدت اور نیلامی میں شرکت کی شرائط کے بارے میں تفصیلی بریفنگ دی گئی۔ اجلاس کے دوران وزیراعظم نے واضح کیا کہ پی آئی اے کی نجکاری کے ہر مرحلے میں شفافیت کو بنیادی حیثیت حاصل ہونی چاہیے۔

شہباز شریف نے ہدایت کی کہ نجکاری کے پورے عمل کو مقررہ وقت میں مکمل کیا جائے اور سرمایہ کاروں کو اعتماد میں لینے کے لیے روڈ شوز کے ساتھ ساتھ ان سے براہ راست رابطے بھی کیے جائیں۔ انہوں نے تجویز دی کہ شفافیت کو یقینی بنانے کے لیے پی آئی اے سمیت مستقبل میں تمام سرکاری اداروں کی نجکاری کی کارروائیاں براہ راست ٹیلی ویژن اور ڈیجیٹل پلیٹ فارمز پر نشر کی جائیں۔

اجلاس کے دوران یہ بھی بتایا گیا کہ سرمایہ کاروں کی دلچسپی بڑھانے اور انہیں بہتر انداز میں معلومات فراہم کرنے کے لیے ایک جامع حکمت عملی بنائی گئی ہے، جس پر کنسلٹنٹ کے تعاون سے عمل درآمد جاری ہے۔

اجلاس میں وفاقی وزراء خواجہ آصف، احد چیمہ، عطا اللہ تارڑ، اٹارنی جنرل منصور اعوان، مشیران محمد علی، سید توقیر شاہ، وزیر مملکت بلال اظہر کیانی، معاون خصوصی ہارون اختر، نیشنل کوآرڈینیٹر برائے خصوصی سرمایہ کاری سہولت کونسل لیفٹیننٹ جنرل سرفراز احمد اور دیگر اعلیٰ حکام نے شرکت کی۔