پاکستان کے مختلف شہروں میں زلزلے کے شدید جھٹکے، عوام میں خوف و ہراس

اسلام آباد/لاہور/پشاور:
وفاقی دارالحکومت اسلام آباد، لاہور اور ملک کے متعدد شہروں میں آج شدید زلزلے کے جھٹکے محسوس کیے گئے، جس کے باعث عوام میں شدید خوف و ہراس پھیل گیا۔ لوگ اپنے گھروں، دفاتر اور عمارتوں سے باہر نکل آئے اور کلمہ طیبہ کا ورد کرتے رہے۔

زلزلے کے جھٹکے اسلام آباد، راولپنڈی، لاہور، پشاور، صوابی، دیر، سوات، مالاکنڈ، چترال، ایبٹ آباد، بٹ گرام، مردان، مہمند، لوئر دیر، کوہاٹ، باجوڑ اور دیگر علاقوں میں بھی محسوس کیے گئے۔

آزاد کشمیر کے علاقے بھمبر، سماہنی اور گردونواح میں بھی زمین لرز اٹھی۔ زلزلے کے بعد لوگ شدید خوف کے عالم میں کھلے مقامات کی جانب دوڑ پڑے۔

تاحال کسی جانی یا مالی نقصان کی اطلاع موصول نہیں ہوئی، تاہم ریسکیو اداروں کو الرٹ کر دیا گیا ہے اور ایمرجنسی سروسز کو فوری حرکت میں آنے کی ہدایات جاری کی گئی ہیں۔ حکام نے ممکنہ آفٹر شاکس کے پیش نظر عوام کو محتاط رہنے اور بلند عمارتوں سے دور رہنے کی ہدایت کی ہے۔

متعلقہ ادارے زلزلے کی شدت اور مرکز سے متعلق معلومات اکھٹی کر رہے ہیں، جبکہ عوام کو افواہوں پر کان نہ دھرنے اور سرکاری اطلاعات کا انتظار کرنے کی تاکید کی گئی ہے۔

زلزلے کے دوران زیادہ تر علاقوں میں ٹیلی کمیونیکیشن سروسز میں بھی وقتی تعطل دیکھا گیا، تاہم صورتحال پر مسلسل نظر رکھی جا رہی ہے۔