اسد قیصر کا حکومت پر شدید تنقید، عمران خان کی بہنوں کی گرفتاری قابلِ مذمت قرار

پاکستان تحریک انصاف کے مرکزی رہنما اسد قیصر نے موجودہ سیاسی صورتحال پر شدید ردِعمل کا اظہار کرتے ہوئے کہا ہے کہ ملک میں آئین و قانون کی عملداری مکمل طور پر مفلوج ہو چکی ہے، اور ایک جعلی حکومت کو بچانے کے لیے تمام آئینی و انسانی اقدار کو روندا جا رہا ہے۔

اپنے سوشل میڈیا پلیٹ فارم ایکس (سابقہ ٹوئٹر) پر جاری بیان میں اسد قیصر نے کہا کہ عمر ایوب خان، دیگر سینئر رہنماؤں اور چیئرمین عمران خان کی بہنوں کی گرفتاری قابل مذمت ہے۔ ان کا کہنا تھا کہ ریاستی طاقت کا استعمال صرف سیاسی انتقام کے لیے کیا جا رہا ہے، جس سے یہ ظاہر ہوتا ہے کہ حکمران فارم 47 کی پیداوار جعلی حکومت کو بچانے کے لیے ہر حد پار کرنے کو تیار ہیں۔

انہوں نے کہا کہ عمران خان جیسے قومی رہنما سے ان کے قریبی ساتھیوں اور اہل خانہ کو ملاقات سے روکنا انسانی حقوق کی کھلی خلاف ورزی ہے، جو جمہوریت کے چہرے پر بدنما داغ ہے۔ اسد قیصر کا کہنا تھا کہ یہ سب اقدامات سیاسی مخالفین کو دبانے کی ایک گھٹیا کوشش ہے، جسے قوم کسی صورت قبول نہیں کرے گی۔

دوسری جانب، نیوز ایجنسی کے مطابق اڈیالہ جیل کے باہر سے عمران خان کی تینوں بہنوں سمیت پی ٹی آئی کے 7 رہنماؤں کو حراست میں لیا گیا تھا، تاہم بعد ازاں تمام افراد کو رہا کر دیا گیا۔

رپورٹس کے مطابق عمر ایوب، صاحبزادہ حامد رضا اور احمد خان بچھر، بانی چیئرمین عمران خان سے ملاقات کے لیے اڈیالہ جیل پہنچے تھے، جہاں پولیس نے انہیں ناکے پر روک کر حراست میں لے لیا۔ اسی دوران علیمہ خان، نورین خانم اور عظمی خانم کو بھی پولیس نے گرفتار کیا۔

ذرائع کا کہنا ہے کہ بعد ازاں عمر ایوب، صاحبزادہ حامد رضا اور احمد خان بچھر کو چکری انٹرچینج کے قریب چھوڑ دیا گیا، جبکہ عمران خان کی تینوں بہنوں اور قاسم خان کو بھی رہا کر دیا گیا، جو بعد ازاں چکری انٹرچینج سے روانہ ہو گئے۔