اسحاق ڈار: فتنے سے کوئی ڈیل نہیں، نو مئی کے ذمہ دار قیمت ادا کر رہے ہیں

نائب وزیراعظم اور وزیر خارجہ اسحاق ڈار نے کہا ہے کہ فتنے کے ساتھ کوئی ڈیل نہیں ہو سکتی، اور حکومت کسی اصول پر کمپرومائز نہیں کرے گی۔ اگر کسی کو بات چیت کرنی ہے تو پہلے اسے سرنڈر کرنا ہوگا۔ جن لوگوں نے نو مئی کے واقعات کیے، وہ اس کی قیمت چکا رہے ہیں۔ لندن میں میڈیا سے گفتگو کرتے ہوئے نائب وزیراعظم نے یہ بھی کہا کہ 9 مئی کے واقعات میں انصاف ہوتا ہوا نظر آ رہا ہے۔ اپنے ہی ملک کے خلاف باتیں کرنے والوں کو شرم آنی چاہیے۔ لاکھوں ڈالر دے کر پاکستانی اداروں کو بدنام کرنا واقعی قابل مذمت ہے۔ انہوں نے مزید کہا کہ اگر کسی نے سیاست کرنی ہے تو اسے پاکستان جا کر کرنی چاہیے۔ حکومت کسی اصول پر کمپرومائز نہیں کرے گی۔ اگر عدالتوں نے قانونی عمل کے تحت کسی کو سزا دی ہے تو اس میں ہم کیا کر سکتے ہیں؟

ایک سوال کے جواب میں وزیر خارجہ اسحاق ڈار نے بتایا کہ مسلم لیگ ن کے صدر میاں نواز شریف کی طبیعت ٹھیک ہے۔ یہاں ان کے روٹین کے مطابق چیک اپ ہوگا، ڈاکٹر ان کا طبی معائنہ کریں گے اور اگر ضرورت پڑی تو کچھ میڈیکل ٹیسٹ بھی کیے جائیں گے۔ مہنگائی اب سنگل ڈیجیٹ میں آ چکی ہے، اور پاکستان ترقی کی راہ پر گامزن ہے۔ ایران میں پیش آنے والا واقعہ بہت افسوس ناک ہے، اور میں ایران میں تمام لوگوں سے رابطے میں ہوں۔ ایرانی حکومت نے پاکستانیوں کے قتل میں ملوث افراد کو پکڑنے کی یقین دہانی کرائی ہے۔