news
عمران ہاشمی کے بیٹے کی کینسر سے جنگ: ایک باپ کی دردناک داستان
بالی ووڈ کے خوش پوش اداکار عمران ہاشمی کی زندگی کا سب سے مشکل دور وہ تھا جب ان کے چھوٹے بیٹے ایان کو کینسر کی تشخیص ہوئی۔
حال ہی میں رنویر الہ آبادیہ کے ساتھ ایک پوڈکاسٹ میں انہوں نے اس دردناک تجربے کی کہانی سنائی، جو سننے والوں کے رونگٹے کھڑے کر دیتی ہے۔
عمران ہاشمی نے بتایا کہ وہ اپنی اہلیہ پروین اور بیٹے ایان کے ساتھ ممبئی کے شاندار ہوٹل تاج لینڈز اینڈ میں برنچ کر رہے تھے، جب اچانک پروین نے کہا، “بیٹے کے پیشاب میں خون آیا ہے۔” یہ سن کر ان کی دنیا ہی بدل گئی، اور خوشگوار دوپہر ایک ڈراؤنے خواب میں تبدیل ہو گئی۔
وہ تین گھنٹے ڈاکٹر کے کلینک میں گزارے، جہاں ایان کو کینسر کی تشخیص ہوئی۔ اگلے دن فوری طور پر آپریشن ہوا اور کیموتھراپی کا طویل سلسلہ شروع ہوا۔
عمران نے کہا، “ہمیں اپنے تین سالہ بیٹے کے سامنے مضبوط رہنا تھا، اس لیے ہم اس کے سامنے نہیں رو سکتے تھے۔ جب وہ نہیں دیکھتا تھا، تو ہم ایک کمرے میں جا کر پھوٹ پھوٹ کر رو لیتے تھے۔”
پانچ سال تک جاری رہنے والے اس علاج کے دوران، عمران اور پروین نے اپنے چہروں پر مسکراہٹیں سجائے بیٹے کو ہمت دی، حالانکہ ان کا دل خون کے آنسو روتا تھا۔ آج ایان صحت یاب ہے، لیکن عمران کے لیے وہ دن آج بھی ایک ڈراؤنے خواب کی طرح یاد آتے ہیں۔