پی ٹی آئی سیاسی کمیٹی کا اعلامیہ: پارٹی عہدیداروں کو بیان بازی سے روک دیا گیا

پی ٹی آئی کی سیاسی کمیٹی نے پارٹی کے عہدیداروں کو ایک دوسرے کے خلاف بیان بازی سے روک دیا ہے۔ کمیٹی کے اعلامیہ میں واضح کیا گیا ہے کہ پارٹی کی ہدایات اور بیانات صرف مرکزی سیکرٹری اطلاعات کی جانب سے جاری کیے جائیں گے۔ اگر کوئی پارٹی ہدایات کی خلاف ورزی کرتا ہے تو اس کے خلاف شوکاز نوٹس جاری کیا جائے گا اور اس کی ذمہ داریاں واپس لے لی جائیں گی۔

پی ٹی آئی ایکس پر جاری کردہ تحریک انصاف کی سیاسی کمیٹی کے اعلامیہ کے مطابق، خیبر پختونخوا اسمبلی میں زیر بحث مائنز اینڈ منرلز بل پر ایک تفصیلی اجلاس ہوا، جس میں وزیراعلیٰ علی امین گنڈاپور نے بل کے تمام اہم نکات کی جامع وضاحت کی۔ کمیٹی نے اس بل کے تمام پہلوؤں کا بغور جائزہ لیا اور متفقہ طور پر یہ طے پایا کہ بل میں صوبائی خودمختاری، حقوق و معدنی وسائل وفاق، SIFC یا کسی بھی وفاقی ادارے کو منتقل کرنے کی کوئی شق شامل نہیں ہے۔

تمام سٹیک ہولڈرز کی مثبت تجاویز کا خیرمقدم کیا جائے گا۔ بل کی منظوری سے پہلے دیگر پارلیمانی جماعتوں سے مشاورت کا عمل جاری رہے گا۔ خیبر پختونخوا اسمبلی میں بل پیش کیا جا چکا ہے اور اس پر بحث جاری ہے، لیکن یہ بل عمران خان کے ایجنڈے، منشور، بیانیے اور عوامی امنگوں کے عین مطابق ہوگا۔ بل کی منظوری قائد عمران خان سے تفصیلی مشاورت، باقاعدہ اجازت اور اعتماد میں لینے کے بعد ہی اسمبلی سے منظور کروائی جائے گی۔