پاکستان کی سپریم کورٹ نے 9 مئی کے ملزمان کی ضمانتیں منسوخ کرنے کی درخواست کو مسترد کر دیا ہے۔ تفصیلات کے مطابق، سپریم کورٹ نے اس درخواست کو مسترد کرتے ہوئے سپیشل پراسیکیوٹر کو دو نکات پر ہدایات لینے کا حکم دیا۔ سماعت کے دوران، سپیشل پراسیکیوٹر ذوالفقار نقوی نے یہ مؤقف اختیار کیا کہ یہ ضمانتیں ضابطہ فوجداری کی دفعہ 497 کے تحت دی گئی ہیں، اور یہ کہ سیکشن 497 کا انسداد دہشتگردی کے مقدمات میں اطلاق نہیں ہوتا۔ انہوں نے مزید کہا کہ 9 مئی کو ہونے والے واقعات کے بارے میں کچھ مواد عدالت کے سامنے پیش کرنا چاہتے ہیں۔

اس پر چیف جسٹس یحییٰ آفریدی نے ریمارکس دیے کہ ہم اس مواد کا انتظار کر رہے تھے، لیکن یہ پہلے جمع نہیں کرایا گیا۔ انہوں نے کہا کہ بجائے ضمانت منسوخ کرنے کے، ہم 3 ماہ میں فیصلے کا حکم دے دیتے ہیں اور ٹرائل کورٹس کو یہ پابند کریں گے کہ ہر 15 دن بعد ہائی کورٹ کو پیش رفت کی رپورٹ جمع کرائیں۔

دوسری جانب، ملتان کی عدالت نے 9 مئی کے جلاﺅ گھیراﺅ اور توڑ پھوڑ کے مقدمات میں پی ٹی آئی رہنما شاہ محمود قریشی کی تین مقدمات میں ضمانت منظور کر لی۔ ایڈیشنل ڈسٹرکٹ اینڈ سیشن جج سائرہ نورین نے تھانہ کینٹ میں درج مقدمات کی سماعت کی، جہاں شاہ محمود قریشی کو جیل سے واٹس ایپ ویڈیو کال کے ذریعے عدالت میں پیش کیا گیا۔ ان کی جانب سے ایڈووکیٹ ضمیر حسین سنڈھل نے عدالت میں دلائل پیش کیے۔

امریکہ میں مقیم پاکستانیوں کی وفد کے جیل میں سینئر عہدیدار اور عمران خان سے ملاقات کا انکشاف ہوا ہے۔ صحافی انصار عباسی کے مطابق امریکہ میں مقیم پاکستانی ڈاکٹروں اور تاجروں کے ایک گروپ نے اسلام آباد میں ایک سینیئر عہدیدار اور پی ٹی آئی کے بانی چیئرمین عمران خان سے اڈیالہ جیل میں ملاقات کی ہے، یہ ملاقاتیں مبینہ طور پر عمران خان کے لیے کچھ ریلیف حاصل کرنے کے لیے کی گئی ہیں، بیک چینل کی یہ کوششیں اُن مذاکرات سے الگ ہیں جو پی ٹی آئی اور متعلقہ حلقوں کے درمیان پہلے ہوئیں تاہم ان کے نتیجے میں توقع ہے پی ٹی آئی اور سٹیبلشمنٹ کے درمیان بیک چینل مذاکرات دوبارہ شروع ہو سکتے ہیں تاہم ان کوششوں کی کامیابی کا انحصار پی ٹی آئی سوشل میڈیا اور عمران خان کے رویے پر ہے۔ دوسری جانب پی ٹی آئی رہنما اعظم سواتی نے کہا ہے کہ میرے بارے میں عمران خان سے منسوب غلط خبریں چلائی گئیں، پی ٹی آئی کے بانی سے ملاقات کے وقت بشریٰ بی بی بھی موجود تھیں، عمران خان سے کہا کہ آپ کی جیب میں کھوٹے سکے ہیں، میں نے کہا اب مانسہرہ میں میرے ایک لاکھ ووٹ نہیں، سو ووٹ بھی نہیں، دسمبر 2022ء میں پی ٹی آئی کے بانی نے مجھے کہا آرمی چیف سے بات چیت کرنا چاہتا ہوں، عمران خان نے کہا مجھے آپ پر اعتماد ہے جائیں اور فوجی قیادت سے بات کریں، بانی سے مشاورت کے بعد آرمی چیف کے استاد کے ذریعے رابطے کی کوشش کی۔

انہوں نے کہا کہ آرمی چیف سے عارف علوی کے ذریعے بھی بات کرنے کی کوشش کی لیکن دروازے نہ کھلے، پارٹی رہنماؤں نے مجھے گھر سے اٹھایا اور 22 اگست کا جلسہ ملتوی کروانے کا کہا، بیرسٹر گوہر میرے گھر آئے اور مجھے اڈیالا جیل لے کر گئے، بانی پی ٹی آئی سے کہا عارف علوی اور ساتھیوں سے مل کر اسٹیبلشمنٹ سے بات کروں گا، بانی نے کہا کسی کو بتانے کی ضرورت نہیں کس سے کہاں رابطہ کر رہے ہو، اگر وہ بات کرنا چاہتے ہیں تو میں پہلے دن سے تیار ہوں۔