امریکی یوٹیوبر جمی ڈونلڈسن، جنہیں دنیا مسٹر بیسٹ کے نام سے جانتی ہے، 27 سال کی عمر میں دنیا کے کم عمر ترین خودساختہ ارب پتی بن گئے ہیں۔ غیر ملکی میڈیا کے مطابق، ان کی مجموعی دولت ایک ارب ڈالر سے تجاوز کر چکی ہے، اور وہ دنیا کے آٹھویں ارب پتی ہیں جنہوں نے یہ دولت اپنی محنت سے کمائی ہے، نہ کہ کسی وراثت سے۔

مسٹر بیسٹ نے یوٹیوب پر 2012 میں ویڈیوز بنانا شروع کیں، لیکن انہیں اصل شہرت 2017 میں اس ویڈیو سے ملی جس میں انہوں نے 100,000 تک گنتی کی۔ اس کے بعد انہوں نے منفرد چیلنجز، انعامی مقابلے اور فلاحی سرگرمیوں کے ذریعے دنیا بھر میں لاکھوں فالوورز حاصل کیے۔ ان کے کاروبار میں ’مسٹر بیسٹ برگر‘ اور ’Feastables‘ نامی چاکلیٹ برانڈ شامل ہیں۔

انہوں نے نئے کریئیٹرز کی مدد کے لیے “Juice Funds” کے نام سے ایک سرمایہ کاری فنڈ بھی قائم کیا ہے۔ فلاحی کاموں میں ان کی شرکت “Team Trees” اور “Beast Philanthropy” جیسے پروجیکٹس کے ذریعے نظر آتی ہے۔ مسٹر بیسٹ کا کہنا ہے کہ وہ اپنی زندگی کی ساری دولت دوسروں کی مدد پر خرچ کرنے کا عزم رکھتے ہیں، جس وجہ سے انہیں دنیا بھر میں بے حد پسند کیا جاتا ہے۔

پاکستانی اداکارہ علیزے شاہ نے اپنی حالیہ ظاہری تبدیلی پر اٹھنے والی پلاسٹک سرجری کی افواہوں کو بے بنیاد قرار دیتے ہوئے سختی سے تردید کر دی ہے۔ حالیہ ڈرامہ “عشق بے پرواہ” میں علیزے شاہ کی شاندار اداکاری نے ناظرین کی توجہ حاصل کی، لیکن ان کے چہرے اور جسامت میں واضح تبدیلی نے سوشل میڈیا پر یہ قیاس آرائیاں شروع کر دیں کہ انہوں نے ممکنہ طور پر کاسمیٹک یا پلاسٹک سرجری کروائی ہے۔

یہ معاملہ اس وقت مزید گرم ہوا جب سینئر اداکارہ صبا فیصل نے ایک ٹی وی شو میں علیزے کے حوالے سے کہا کہ وہ “بیس فیصد قدرتی” نظر آتی ہیں، جب کہ باقی شخصیت مصنوعی لگتی ہے۔ صبا فیصل کے اس تبصرے کے بعد علیزے شاہ نے سوشل میڈیا پر ایک ویڈیو جاری کرتے ہوئے اس تاثر کی نفی کی اور واضح کیا کہ انہوں نے کسی قسم کی پلاسٹک یا کاسمیٹک سرجری نہیں کروائی۔

علیزے نے اپنے بیان میں کہا: “خدارا! میں نے کوئی کاسمیٹک سرجری نہیں کروائی، صرف میرا وزن کم ہوا ہے۔ جب میں نے ’عہدِ وفا‘ کیا تھا، تب میری عمر 17 سال تھی اور اب میں 23 سال کی ہوں۔ ظاہر ہے کہ کوئی بھی شخص چھ سال بعد ایک جیسا نہیں رہتا۔”

علیزے شاہ، جن کے انسٹاگرام پر 4.3 ملین فالوورز ہیں، اکثر اپنی دل کھول کر بات کرنے کی وجہ سے سوشل میڈیا پر موضوعِ بحث رہتی ہیں۔ ان کے دیگر مشہور ڈراموں میں “عہدِ وفا”، “میرا دل میرا دشمن”، “دل موم کا دیا”، “عشق تمنا”، “محبت کی آخری کہانی” اور “تقدیر” شامل ہیں۔