ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ بھارت جھوٹے اور من گھڑت بیانیے کی بنیاد پر خطرناک کھیل کھیل رہا ہے، جبکہ دنیا اب بھارت کی حقیقت کو جان چکی ہے۔ بی بی سی کو انٹرویو دیتے ہوئے ان کا کہنا تھا کہ پاکستان نے انتہائی بالغ نظری سے بھارتی الزامات کا جواب دیا ہے، لیکن اصل تنازع ابھی بھی موجود ہے اور کسی بھی وقت صورتحال بگڑ سکتی ہے۔

لیفٹیننٹ جنرل احمد شریف چوہدری نے کہا کہ 10 مئی کے بعد کئی دن گزر چکے ہیں، لیکن بھارت میں اب بھی جھوٹ پر مبنی بیانیہ چلایا جا رہا ہے۔ انہوں نے زور دیا کہ پاکستان امن کا خواہاں ہے، لیکن اگر جنگ مسلط کی گئی تو ہم اس کے لیے مکمل طور پر تیار ہیں۔ دونوں ممالک ایٹمی قوتیں ہیں اور کسی بھی فوجی تصادم کا نتیجہ انتہائی خطرناک ہوگا۔ ایٹمی جنگ نہ صرف ناقابل تصور بلکہ باہمی تباہی کا باعث ہوگی۔

انہوں نے کہا کہ اگر کسی شدت پسند واقعے میں پاکستانیوں کے ملوث ہونے کے ثبوت ہیں تو بھارت انہیں فراہم کرے، ہم خود کارروائی کریں گے۔ پاکستان میں اس وقت امن کی فضا قائم ہے اور قوم اس کا جشن منا رہی ہے۔

ڈی جی آئی ایس پی آر کا کہنا تھا کہ ہر چند سال بعد بھارت ایک نیا جھوٹا بیانیہ گھڑتا ہے، اور یہ اس کی پرانی عادت بن چکی ہے۔ انہوں نے بھارتی حمایت یافتہ دہشتگرد گروہ “فتنہ الخوارج” پر شدید تنقید کرتے ہوئے کہا کہ یہ گروہ نہ صرف شریعت بلکہ انسانی حقوق کی کھلی خلاف ورزی کر رہا ہے۔ یہ لوگ مساجد کو پناہ گاہ بنا کر ان کا تقدس پامال کرتے ہیں اور سیکیورٹی فورسز پر فائرنگ کرتے ہیں تاکہ جوابی کارروائی سے بچ سکیں۔

ان کا مزید کہنا تھا کہ فتنہ الخوارج مذہب کے لبادے میں چھپ کر دہشتگردی کر رہا ہے، جو کہ ناقابل برداشت ہے۔ بھارت اس صورتحال کو اپنی داخلی سیاست میں فائدے کے لیے استعمال کر رہا ہے۔ انہوں نے سوال اٹھایا کہ کیا بھارت میں اس وقت کوئی ذمہ دار سیاسی قیادت موجود ہے؟

ٹیکنالوجی کمپنی ایپل نے اپنی سالانہ ورلڈ وائڈ ڈیویلپرز کانفرنس (WWDC) کے انعقاد کا اعلان کر دیا ہے جو 9 جون سے 13 جون 2025 تک جاری رہے گی۔ کمپنی کے مطابق اس دوران اپنی تمام اہم مصنوعات کے نئے سافٹ ویئر اپڈیٹس پیش کیے جائیں گے۔

ایونٹ کا آغاز 9 جون کو مقامی وقت کے مطابق صبح 10 بجے ایک لائیو اسٹریم سے ہوگا جو ایپل کی ویب سائٹ، ایپل ٹی وی ایپ اور یوٹیوب پر نشر کی جائے گی۔ ایونٹ کے اختتام کے بعد اس کا ری پلے بھی دستیاب ہوگا۔

اس بار ایپل کی جانب سے مصنوعی ذہانت (AI) پر خصوصی توجہ دی جا رہی ہے۔ ماہرین کا ماننا ہے کہ ایپل اس کانفرنس میں نئے AI فیچرز متعارف کرائے گا، جن میں Apple Intelligence نامی برانڈڈ AI ٹولز کی مزید بہتری یا توسیع شامل ہو سکتی ہے۔

WWDC ایونٹ ہر سال ایپل کے ڈیویلپرز اور صارفین کے لیے مستقبل کی جھلک پیش کرتا ہے، جس میں iOS، macOS، watchOS اور دیگر پلیٹ فارمز کی اپڈیٹس شامل ہوتی ہیں۔