بالی ووڈ کے معروف اداکار اکشے کمار اپنی نئی فلم میں ’’کتھاکلی‘‘ ڈانس کے ذریعے اپنے مداحوں کو محظوظ کرنے والے ہیں۔

اکشے کمار نے اپنی فلم ’کیسری 2‘ کے لیے کتھاکلی کے رقاص کا شاندار انداز اپنایا ہے۔ انہوں نے انسٹاگرام پر اپنی ایک تصویر شیئر کرتے ہوئے لکھا، ’’یہ صرف ایک کاسٹیوم نہیں، بلکہ یہ ایک علامت ہے، روایت کی، مزاحمت کی، سچائی کی اور میرے ملک کی۔‘‘

اس فلم میں اکشے کمار وکیل اور سیاستدان سی شنکرن نائر کا کردار نبھا رہے ہیں، جو جلیانوالہ باغ کے قتل عام کے بعد انصاف کی تلاش میں برطانوی سلطنت کے خلاف قانونی جنگ لڑتے ہیں۔ کتھاکلی آرٹ میں سبز چہرہ (پچا) عظیم شخصیات، فلسفیوں اور بادشاہوں کی علامت مانا جاتا ہے۔

3 اپریل کو ریلیز ہونے والے فلم کے ٹریلر میں ہندوستان کی تاریخ کی ایک اہم قانونی لڑائی کو پیش کیا گیا ہے۔ فلم کے مطابق، ’’18 اپریل کو ہم آپ کے سامنے وہ عدالتی مقدمہ لے کر آ رہے ہیں جو کسی نصابی کتاب میں نہیں پڑھایا گیا۔‘‘

یہ تصویر دیکھ کر مداح اکشے کمار کے اس نئے اور منفرد انداز پر دیوانہ ہوگئے ہیں۔ یاد رہے کہ ’کیسری 2‘ سنیما گھروں میں 18 اپریل کو ریلیز ہوگی۔

ایک بھارتی اداکارہ نے مشہور فلم ساز ایس ایس راجا مولی کی ایک فلم میں مہیش بابو کے ساتھ کام کرنے کے لیے 30 کروڑ روپے کی خطیر رقم وصول کی ہے۔

دیپیکا پڈوکون، عالیہ بھٹ اور نین تارا کو پیچھے چھوڑتے ہوئے مہنگی ترین اداکارہ کا اعزاز حاصل کرنے والی یہ اداکارہ کوئی اور نہیں بلکہ پریانکا چوپڑا ہیں۔

پریانکا چوپڑا اس وقت ساؤتھ انڈین فلموں کے کامیاب ترین ہدایت کار راجا مولی کی نئی فلم SSMB29 میں کام کر رہی ہیں۔

اس فلم میں پریانکا چوپڑا کے مدمقابل ساؤتھ انڈین سپر اسٹار مہیش بابو ہیں، اور یہ فلم بھارت کی سب سے مہنگی فلم ہونے کا اعزاز بھی حاصل کرے گی، جس کی تخمینی لاگت تقریباً ایک ارب بھارتی روپے ہے۔

پریانکا چوپڑا اپنے شوہر کے ساتھ لاس اینجلس میں رہائش پذیر ہیں اور انہوں نے ایمیزون پرائم ویڈیو کی سیریز ’سیٹاڈل‘ کے لیے 41 کروڑ روپے کا معاوضہ لیا تھا۔

اداکارہ نے ماضی میں بھی بالی ووڈ میں کام کیا ہے، لیکن پچھلے چار سال سے وہ انڈسٹری سے دور تھیں، اور ان کی آخری فلم راج کمار راؤ کے ساتھ تھی۔