وزیر دفاع خواجہ آصف نے کہا ہے کہ اگر ملک میں کرپشن کا صرف 50 فیصد خاتمہ ہو جائے تو ہمیں آئی ایم ایف کی ضرورت نہیں پڑے گی۔ سیالکوٹ چیمبر آف کامرس میں صنعتکاروں سے گفتگو کرتے ہوئے خواجہ آصف نے کہا کہ ملک مشکل دور سے گزر رہا ہے، مگر تمام معاشی اشاریے مثبت آ رہے ہیں اور مہنگائی سنگل ڈیجٹ تک پہنچ گئی ہے۔

خواجہ آصف نے کہا کہ کرپشن ہمارے ملک کو دیمک کی طرح کھا رہی ہے اور حلال و حرام کی تمیز ختم ہو چکی ہے۔ نان کسٹم پیڈ گاڑیوں کی سمگلنگ اور کسٹمز میں کرپشن پر بات کرتے ہوئے انہوں نے کہا کہ کلکٹرز اپنی پوسٹنگ کے لیے کروڑوں کی رشوت دیتے ہیں۔

انہوں نے کہا کہ حکومت برآمدات میں اضافے کے لیے سنگاپور جیسے ماڈلز کو اپنانے کی کوشش کر رہی ہے۔ سیالکوٹ کی مثال دیتے ہوئے انہوں نے کہا کہ نجی شراکت داری سے ایئرپورٹ اور ایئرلائن کا قیام منفرد کامیابی ہے۔

وزیر دفاع نے مزید کہا کہ اسٹاک مارکیٹ مثالی کارکردگی دکھا رہی ہے اور دیگر معاشی اشاریے بھی بہتر ہو رہے ہیں۔ مایوسی کے دور سے نکل چکے ہیں، مگر ابھی کئی رکاوٹیں عبور کرنی باقی ہیں۔ حکومت صنعتکاروں کے مسائل حل کرنے کے لیے سنجیدہ اقدامات کر رہی ہے۔

کراچی: پاکستان اسٹاک مارکیٹ میں ریکارڈ توڑ مندی دیکھنے میں آئی، جہاں جمعرات کے روز پورا دن شدید گراوٹ کا رجحان غالب رہا۔

تفصیلات کے مطابق آج اسٹاک مارکیٹ سے 5 ہزار سے زائد پوائنٹس نکل گئے، کاروبار کا اختتام 4,795 پوائنٹس کی کمی کے ساتھ 1,06,274 پوائنٹس پر ہوا۔ مارکیٹ میں دن بھر 4.32 فیصد کمی دیکھی گئی، جب کہ سب سے کم ترین سطح 1,05,937 پوائنٹس پر ریکارڈ کی گئی۔

آج کے روز 56 ارب روپے کے 1 ارب 16 کروڑ حصص کا کاروبار ہوا۔ اسٹاک مارکیٹ میں 472 کمپنیوں کے حصص میں کاروبار ہوا، جن میں سے 66 کمپنیوں کے حصص کی قیمت میں اضافہ، جبکہ 371 کمپنیوں کے حصص کی قیمت میں کمی ہوئی۔

ماہرین کا کہنا ہے کہ مارکیٹ میں مسلسل اضافے کے بعد کریکشن کی توقع کی جا رہی تھی، جبکہ میوچل فنڈز کی جانب سے زبردست سیلنگ پریشر کے باعث یہ ریکارڈ ساز گراوٹ دیکھنے میں آئی۔

گزشتہ روز بھی اسٹاک مارکیٹ میں ملکی تاریخ کی سب سے بڑی مندی ریکارڈ کی گئی تھی، جب 100 انڈیکس میں 3,842 پوائنٹس کی کمی ہوئی تھی۔ یاد رہے کہ اس سے پہلے 26 نومبر کو 3,505 پوائنٹس کی کمی اسٹاک مارکیٹ کی تاریخ کی سب سے بڑی مندی تھی۔

ماہرین کے مطابق مارکیٹ میں موجودہ حالات سرمایہ کاروں کے لیے باعث تشویش ہیں، اور مزید سیلنگ پریشر کی توقع کی جا رہی ہے۔