امریکا میں ایمیزون ویب سروسز (AWS) میں اچانک آنے والی خرابی کے باعث دو ہزار سے زائد ویب سائٹس بند ہوگئیں۔ رپورٹ کے مطابق رابن ہڈ اور وینمو جیسے بڑے پلیٹ فارم بھی متاثر ہوئے۔ ماہرین کا کہنا ہے کہ مسئلہ امریکا کے مشرقی حصے میں ڈی این ایس سسٹم کی خرابی کے باعث پیدا ہوا۔ ایمیزون کے ترجمان نے تصدیق کی ہے کہ کمپنی اس مسئلے سے آگاہ ہے اور خرابی کی وجوہات معلوم کرنے کے لیے تحقیقات جاری ہیں۔ اس تکنیکی مسئلے کے باعث یو ایس ایسٹ سے منسلک عالمی سروسز بھی متاثر ہو سکتی ہیں۔

آن لائن اسٹریمنگ پلیٹ فارم نیٹ فلکس کی نئی کورین سیریز ’جینی – میک اے وِش‘ ریلیز ہوتے ہی شدید تنازعے کا شکار ہوگئی۔ یہ سیریز 3 اکتوبر کو ریلیز کی گئی، تاہم ناظرین کا کہنا ہے کہ اس میں اسلامی عقائد کو مسخ اور مذہبی تصورات کو غلط انداز میں پیش کیا گیا ہے۔

میڈیا رپورٹس کے مطابق، سیریز میں ابلیس (شیطان) کو ایک جینی یعنی جن کے طور پر مثبت اور رومانوی کردار میں دکھایا گیا ہے، جبکہ فرشتوں کو منفی کرداروں کے طور پر پیش کیا گیا ہے۔ ناظرین نے اس مواد کو مذہبی توہین قرار دیتے ہوئے نیٹ فلکس کے بائیکاٹ کا مطالبہ کر دیا ہے۔

سیریز کی کہانی ابلیس کے گرد گھومتی ہے جو غرور میں آکر انسان کو سجدہ کرنے سے انکار کرتا ہے، لیکن بعد میں محبت میں گرفتار ہوکر سجدہ کرنے پر مجبور ہوتا ہے۔ اس میں انسان کے ایک سے زائد جنم دکھائے گئے ہیں، جو اسلامی تعلیمات کے منافی تصور کیا جا رہا ہے۔

شائقین کا کہنا ہے کہ تفریح کے نام پر مذہبی عقائد کو مسخ کرنا قابلِ مذمت ہے۔ میڈیا رپورٹس کے مطابق سیریز میں کورین اداکار کم وہ بن، نوح سینگ ہینگ اور بئی سوزی نے مرکزی کردار ادا کیے ہیں۔

دوسری جانب، نیٹ فلکس اور ڈرامہ سازوں نے اس تنازع پر تاحال خاموشی اختیار کی ہوئی ہے، البتہ ایک اداکارہ نے مؤقف دیا کہ یہ محض تفریحی مقصد کے لیے بنایا گیا ہے اور اس میں حقیقت اور فینٹسی کا امتزاج پیش کیا گیا ہے تاکہ ناظرین لطف اندوز ہو سکیں۔