پاکستان تحریک انصاف کے بانی چیئرمین اور پیٹرن انچیف عمران خان کے جیل میں وزن کم ہونے اور مختلف بیماریوں میں مبتلا ہونے کے خدشے پر اسلام آباد ہائیکورٹ میں طبی معائنے کی درخواست دائر کی گئی ہے۔ یہ درخواست عمران خان اور وزیراعلیٰ خیبرپختونخواہ علی امین گنڈاپور کی جانب سے دی گئی، جس میں مؤقف اپنایا گیا ہے کہ 72 سالہ عمران خان کا باقاعدہ طبی معائنہ ضروری ہے۔ درخواست میں پنجاب حکومت، آئی جی جیل خانہ جات، جیل اسپتال اور شوکت خانم ہسپتال کو فریق بنایا گیا ہے اور مطالبہ کیا گیا ہے کہ شوکت خانم کی طبی ٹیم کو ماہانہ بنیاد پر معائنہ کرنے کی اجازت دی جائے۔ اس دوران سپریم کورٹ نے 9 مئی کے 8 مقدمات میں عمران خان کی ضمانت کی اپیلوں کو 12 اگست کو سماعت کے لیے مقرر کر دیا ہے، جس کے لیے چیف جسٹس یحییٰ آفریدی کی سربراہی میں تین رکنی بینچ تشکیل دیا گیا ہے۔ ادھر توشہ خانہ ٹو کیس کی اڈیالہ جیل میں مقرر سماعت ملتوی کر دی گئی اور عدالت نے بتایا کہ اس کیس کی نئی تاریخ جوڈیشل کمپلیکس اسلام آباد میں دی جائے گی۔

قومی اسمبلی کی تجارت کی ذیلی کمیٹی کے اجلاس میں بتایا گیا کہ 2010 میں چینی کی ایکسپورٹ پر عوامی پیسے سے فی کلو 11 روپے سبسڈی دی گئی، جس کے تحت 15 لاکھ ٹن چینی برآمد کی اجازت تھی۔ اجلاس میں چینی کی قیمت، امپورٹ ایکسپورٹ اور سبسڈی سے متعلق تفصیلات زیر بحث آئیں۔ وزارت صنعت کے حکام نے بتایا کہ اس وقت شوگر اسٹاک وافر تھا اور اگلا سیزن قریب ہونے کے باعث سبسڈی کا فیصلہ کیا گیا تاکہ ذخیرہ ضائع نہ ہو۔ مزید انکشاف ہوا کہ ملک میں اس وقت بھی 17 لاکھ ٹن چینی کا ذخیرہ موجود ہے جبکہ اوسط قیمت 179 روپے فی کلو ہے۔ تاجکستان سمیت 7.5 لاکھ ٹن چینی ایکسپورٹ کی جا چکی ہے۔