پاکستان تحریک انصاف کے مرکزی رہنما راؤف حسن نے کہا ہے کہ عمران خان جانتے ہیں کہ ملک میں اصل طاقت وزیراعظم کے عہدے میں نہیں بلکہ اسٹیبلشمنٹ کے پاس ہے، اس لیے اگر کوئی بات چیت ہونی ہے تو انہی سے ہونی چاہیے جن کے پاس اصل اختیار ہے۔ ایک نجی ٹی وی پروگرام میں گفتگو کرتے ہوئے ان کا کہنا تھا کہ پی ٹی آئی میں کسی قسم کا انتشار نہیں بلکہ مختلف آراء کا اظہار ہے، جو کسی بھی جمہوری جماعت میں فطری عمل ہے۔ ان کا کہنا تھا کہ تین سال سے پارٹی مسلسل دباؤ کا شکار ہے، مگر اس کے باوجود تمام رہنما عمران خان کی قیادت پر متحد ہیں۔ انہوں نے کہا کہ عمران خان کو تنہا کر دیا گیا ہے، لیکن جیسے ہی ملاقات یا رابطہ ممکن ہوگا، پارٹی کے اندر تمام اختلافات بھی ختم ہو جائیں گے۔ راؤف حسن کے مطابق بجٹ پیش کرنے سے قبل عمران خان سے ملاقات ضروری تھی تاکہ واضح رہنمائی حاصل ہو سکے۔
دوسری طرف خیبرپختونخواہ کے مشیر اطلاعات بیرسٹر سیف نے کہا ہے کہ بجٹ کی منظوری دراصل اپوزیشن کی سازشوں کو ناکام بنانے کے لیے ضروری تھی، کیونکہ اپوزیشن کی خواہش تھی کہ بجٹ پاس نہ ہو اور ایمرجنسی نافذ کی جا سکے۔ انہوں نے واضح کیا کہ تحریک انصاف عمران خان کی ہدایات کی پابند ہے اور اگر ان کی ملاقات وزیر اعلیٰ سے ہو جاتی ہے تو بجٹ میں ان کی ہدایت کے مطابق رد و بدل ممکن ہے۔ تاہم، پارٹی میں اختلافات کی ایک اور جھلک اس وقت سامنے آئی جب خیبرپختونخواہ کے پی ٹی آئی صدر جنید اکبر اور سینئر رہنما اسد قیصر نے پارٹی فیصلوں سے خود کو علیحدہ کر لیا۔ ان کا کہنا تھا کہ عمران خان کی براہ راست ہدایات نہ ہونے کے باعث بجٹ پیش کرنا غیر مناسب قدم تھا۔ اسد قیصر نے مزید شکوہ کیا کہ پارٹی پالیسی سازی کے عمل میں سخت مشکلات درپیش ہیں اور موجودہ حالات میں واضح رہنمائی کی غیر موجودگی نے پیچیدگیاں پیدا کر دی ہیں۔

بھارت کی عسکری قیادت نے بالآخر اعتراف کر لیا ہے کہ پاکستان کو میدانِ جنگ میں زیر کرنا ممکن نہیں ہو سکا۔ بھارتی فوج کے سابق افسر اور معروف دفاعی تجزیہ کار پراوین سواہنے نے تسلیم کیا ہے کہ پاکستان ناقابلِ شکست ہے اور مغربی محاذ پر اُسے آج تک کبھی شکست نہیں دی جا سکی۔ ان کے مطابق اگر بھارت واقعی مغرب میں پاکستان کو فتح کر چکا ہوتا تو آج لائن آف کنٹرول کا وجود ہی نہ ہوتا۔ بھارتی فوجی قیادت نے وضاحت کی کہ 1971ء کی جنگ میں بھی پاکستان کو صرف مشرقی محاذ پر شکست ہوئی، جہاں بھارت نے زمینی و فضائی رابطے کاٹ کر سپورٹ روک دی تھی، جبکہ مغربی محاذ پر پاکستانی فوج نے ہمیشہ بھرپور مزاحمت کی۔ اس کے ساتھ ہی بھارت کے سابق انٹیلیجنس چیف امرجیت سنگھ دولت نے بھی اپنی سیکیورٹی اداروں کی ناکامی تسلیم کرتے ہوئے کہا کہ پہلگام حملہ بھارتی انٹیلیجنس کی ناکامی تھی اور اس واقعے کا کوئی ثبوت موجود نہیں تھا۔ انہوں نے پاکستان کو خطے کے استحکام کے لیے ایک اہم فریق قرار دیا اور اس امر پر زور دیا کہ مودی حکومت نے پاکستان مخالف بیانیے کے ذریعے عوام کی ذہن سازی کی ہے، جس کے تحت کشمیر یا بھارت میں رونما ہونے والے ہر واقعے کا الزام پاکستان پر ڈال دیا جاتا ہے۔ ان کا یہ بھی کہنا تھا کہ پاکستان نے بھارت کے چھ جنگی طیارے بھی مار گرائے، جبکہ ایران اسرائیل تنازع میں فیلڈ مارشل سید عاصم منیر کا کردار اہم ہوسکتا ہے۔