حکومت معیشت میں بہتری کے دعوے کر رہی ہے، لیکن صنعتی شعبے کو چلانے میں ناکام نظر آ رہی ہے۔ رواں مالی سال کی پہلی ششماہی کے دوران ملک کی بڑی صنعتوں کی پیداوار میں مزید کمی واقع ہوئی ہے۔ وفاقی ادارہ شماریات کی جانب سے جاری کردہ رپورٹ میں بتایا گیا ہے کہ بڑی صنعتوں کی پیداوار میں مزید کمی آئی ہے۔

ادارہ شماریات کی ششماہی رپورٹ کے مطابق، دسمبر میں سالانہ بنیادوں پر بڑی صنعتوں کی پیداوار میں 3.73 فیصد کی کمی ریکارڈ کی گئی، جبکہ نومبر کی نسبت دسمبر میں پیداوار میں 19.07 فیصد کا اضافہ ہوا۔

رپورٹ کے مطابق، جولائی سے دسمبر کے دوران فرنیچر کی صنعتی پیداوار میں 61.06 فیصد، مشینری اور ایکوئپمنٹ کی پیداوار میں 27.88 فیصد، اور الیکڑیکل ایکوئپمنٹ کی پیداوار میں 19.10 فیصد کی کمی دیکھی گئی۔

آئرن اینڈ سٹیل مصنوعات کی پیداوار میں 12.04 فیصد، جبکہ کیمیکلز کی پیداوار میں 8.87 فیصد کی کمی ریکارڈ کی گئی۔ تاہم، جولائی سے دسمبر کے دوران آٹوموبیل سیکٹر کی پیداوار میں 50.16 فیصد کا اضافہ ہوا، تمباکو کی صنعتی پیداوار میں 19.21 فیصد، اور پیپر اور بورڈ کی پیداوار میں 2.81 فیصد کا اضافہ ہوا۔ اسی دوران فارماسیوٹیکل سیکٹر میں بھی کچھ بہتری دیکھی گئی۔

وفاقی وزیر رانا تنویر حسین نے واضح کیا ہے کہ یوٹیلیٹی سٹورز کو بند نہیں کیا جائے گا، بلکہ نجی شعبے کے تعاون سے ان کی بہتری کی کوشش کی جائے گی۔ حکومت نے ایوان بالا میں پالیسی بیان دیتے ہوئے کہا کہ یوٹیلیٹی سٹورز کی بندش کا کوئی ارادہ نہیں، بلکہ نظام کو بہتر بنا کر ان کی نجکاری کی جائے گی۔ ایوان میں یوٹیلیٹی سٹورز کی بندش کے حوالے سے سوال کا جواب دیتے ہوئے وزیر صنعت و پیداوار رانا تنویر حسین نے بتایا کہ ہم یوٹیلیٹی سٹورز کو بند نہیں کریں گے، بلکہ ان کی نجکاری کے لیے اصلاحاتی عمل جاری ہے۔

ہر سال یوٹیلیٹی سٹورز کو 50 ارب روپے کی سبسڈی دی جاتی ہے۔ پچھلے سال رمضان پیکج کے تحت ان کو 17 ارب روپے کی سبسڈی ملی تھی۔ اس سال حکومت نے رمضان پیکج کے لیے 20 ارب روپے کی سبسڈی مختص کی ہے۔ انہوں نے کہا کہ پہلی بار 40 لاکھ افراد کو رمضان پیکج کے تحت نقد امداد فراہم کی جائے گی۔

وفاقی وزیر نے مزید کہا کہ صرف غیر منافع بخش سٹورز بند کیے جائیں گے۔

مستقل اور کنٹریکٹ ملازمین کے حقوق کا تحفظ یقینی بنایا جائے گا۔ رانا تنویر حسین نے یہ بھی کہا کہ یوٹیلیٹی سٹورز کے ذریعے رمضان پیکج کے تجربات کامیاب نہیں رہے، کیونکہ غریب لوگوں کو معیاری اشیاء فراہم نہیں کی جا سکیں۔ سینیٹ اجلاس میں پیپلز پارٹی کے سینیٹرز شہادت اعوان اور شیری رحمٰن نے سرکاری ملازمین کے دو روز سے جاری احتجاج کا معاملہ اٹھایا۔