قومی اسمبلی کے اجلاس میں پاکستان پیپلز پارٹی کے رہنماؤں نے انٹرنیٹ کی سست رفتاری اور بندش پر حکومت کو آڑے ہاتھوں لیا۔

پیپلز پارٹی کی رکن قومی اسمبلی شازیہ مری نے اظہارِ خیال کرتے ہوئے کہا، ’’انٹرنیٹ کی رفتار کا ستیاناس کر دیا گیا ہے۔ وزارتِ آئی ٹی بدحالی کا شکار ہے۔ یہ کون سی فائر وال ہے؟ اس صورتحال میں ڈیجیٹل نیشن پاکستان بل لانے پر مجھے ہنسی آتی ہے۔‘‘

دوسری جانب، پیپلز پارٹی کے ایم این اے عبدالقادر پٹیل نے کہا، ’’انٹرنیٹ کا اتنا برا حال کیوں کیا گیا؟ آئی ٹی سے جڑے لوگوں کا اربوں روپے کا نقصان ہو گیا ہے۔ اتنی بدحالی کسی وزارت میں پہلے کبھی نہیں دیکھی۔‘‘

اس پر پارلیمانی سیکرٹری برائے آئی ٹی ساجد مہدی نے وضاحت دیتے ہوئے کہا، ’’پاکستان میں سکیورٹی مسائل کی وجہ سے وزارتِ داخلہ کی ہدایت پر انٹرنیٹ بند کیا جاتا ہے۔ اس کا وقت بھی وزارتِ داخلہ طے کرتی ہے۔ ہم تب تک کچھ نہیں کر سکتے جب تک وزارتِ داخلہ حالات کو ٹھیک قرار نہ دے۔‘‘

وزیر مملکت برائے انفارمیشن ٹیکنالوجی شزہ فاطمہ خواجہ نے بھی اس معاملے پر بات کرتے ہوئے کہا، ’’انٹرنیٹ بند ہونے سے نہ ہمیں خوشی ہوتی ہے اور نہ کوئی فائدہ۔ ہم نے صوبائی وزرائے داخلہ کے ساتھ مشاورت کر کے صرف ٹارگٹ علاقوں میں انٹرنیٹ بند کیا، پورے ملک کو متاثر نہیں کیا۔ اگر اظہارِ رائے پر پابندی لگانی ہوتی تو ٹک ٹاک اور فیس بک بھی بند ہوتے۔ ہمیں یوزرز کو پیش آنے والی مشکلات پر افسوس ہے اور میں معذرت خواہ ہوں۔

پاکستان میں وزرا اور مشیروں کی تنخواہوں میں 900 فیصد تک اضافے پر امریکی وزارت خارجہ کے ترجمان میتھیو ملر کا بیان سامنے آیا ہے۔

امریکی وزارت خارجہ کی معمول کی پریس بریفنگ کے دوران ایک صحافی نے پاکستان میں وزرا کی تنخواہوں میں اضافے کے حوالے سے سوال کیا۔ صحافی نے کہا کہ یہ اضافہ ایک ایسے ملک میں ناقابل قبول ہے جہاں غربت اپنی انتہا کو پہنچ چکی ہے، اور پھر حکومتی عہدیداران عالمی مالیاتی اداروں سے قرضے مانگنے آتے ہیں۔

اس سوال پر امریکی ترجمان نے ابتدا میں مبہم انداز میں جواب دیا کہ انہیں اندازہ ہے کہ سوال اہم ہے اور امید ظاہر کی کہ وہ جلد اس پر پہنچیں گے۔ تاہم، جب صحافی نے اپنی بات کی وضاحت کرتے ہوئے امریکا کے مؤقف پر سوال کیا تو میتھیو ملر نے صاف کہا کہ تنخواہوں میں اضافے کا معاملہ پاکستان کے عوام اور ان کی حکومت کا اندرونی معاملہ ہے، نہ کہ امریکا کا مسئلہ۔

انہوں نے مزید وضاحت کرتے ہوئے کہا کہ امریکا دنیا بھر میں کسی بھی ملک کے حکومتی ملازمین کی تنخواہوں پر اپنی رائے دینے سے گریز کرتا ہے، اور یہی پالیسی پاکستان کے لیے بھی اپنائی جائے گی