آئی ایم ایف نے حکومت کے بجلی نرخوں میں کمی کے منصوبے کو منظور کر لیا ہے۔ پاکستانی حکام نے عالمی مالیاتی ادارے کو بجلی کی قیمتیں کم کرنے پر قائل کر لیا ہے۔ میڈیا رپورٹس کے مطابق، ذرائع کا کہنا ہے کہ بجلی کے بنیادی نرخوں میں 1 سے 2 روپے فی یونٹ کمی کا امکان ہے۔ نیپرا اور وزارت توانائی کو نرخوں میں کمی کا اختیار مل گیا ہے۔ پاکستانی حکام نے آئی ایم ایف کو بجلی کا ریٹ 2 روپے فی یونٹ کم کرنے پر راضی کیا ہے، جبکہ بجلی کے بنیادی ٹیرف کو ڈیڑھ سے 2 روپے تک سستا کرنے پر آئی ایم ایف کے ساتھ طویل مذاکرات ہوئے ہیں۔ ذرائع کے مطابق، آئی ایم ایف نے بجلی نرخوں میں کمی پر گرین سگنل دیتے ہوئے نیپرا اور وزارت توانائی کو مشاورت کے ساتھ فیصلہ کرنے کا اختیار دیا ہے۔

نیپرا اور وزارت توانائی کے حکام نے اپریل یا مئی سے بنیادی نرخوں میں زیادہ سے زیادہ 2 روپے فی یونٹ کمی کرنے کی تجویز آئی ایم ایف کے ساتھ شیئر کی ہے۔ ایک ارب ڈالر سے زائد کی دوسری قسط کے حصول کے لیے حکومت اور آئی ایم ایف مشن کے درمیان مذاکرات کا اہم مرحلہ جاری ہے۔ بجلی کے بنیادی ٹیرف میں کمی کے فیصلے پر عمل درآمد اپریل سے ہونے کا امکان ہے، تاہم ٹیرف کم کرنے سے پہلے تقسیم کار کمپنیوں کی نجکاری کا نیا جامع منصوبہ آئی ایم ایف کو پیش کیا جائے گا۔

پاکستان نے عالمی مالیاتی فنڈ (آئی ایم ایف) کو قرض کے حصول کے لیے پی آئی اے اور دیگر سرکاری اداروں کی فروخت کی یقین دہانی کرائی ہے۔ نجکاری کمیشن نے آئی ایم ایف کو بتایا ہے کہ پی آئی اے کو جولائی تک بیچنے کا ارادہ ہے۔ ایکسپریس نیوز کے مطابق، حکومت نے آئی ایم ایف کو یہ بھی آگاہ کیا ہے کہ فیصل آباد، اسلام آباد اور گوجرانوالہ کی پاور ڈسٹری بیوشن کمپنیاں دسمبر تک فروخت کرنے کی خواہاں ہے۔

پاکستانی حکام نے آئی ایم ایف کو بتایا کہ عملی طور پر تعطل کا شکار نجکاری پروگرام کے تحت 5 سے 7 ادارے جلد فروخت کرنے کی کوشش کریں گے، جن میں پی آئی اے، 3 مالیاتی ادارے اور 3 پاور ڈسٹری بیوشن کمپنیاں شامل ہیں۔ حکومت نومبر تک زرعی ترقیاتی بینک لمیٹڈ کی فروخت کے لیے پرامید ہے۔

یہ بھی معلوم ہوا ہے کہ حکومت زرعی ترقیاتی بینک کی فروخت کے لیے مالیاتی مشیر کی خدمات حاصل کر رہی ہے اور اسے امید ہے کہ بینک نومبر تک فروخت ہو جائے گا۔ حکام نے کہا ہے کہ ہاؤس بلڈنگ فنانس کارپوریشن کی فروخت کی یقین دہانی بھی کی گئی ہے، حالانکہ پچھلی کئی مہلتیں ختم ہو چکی ہیں۔ حکام کا کہنا ہے کہ یو اے ای فرسٹ ویمن بینک مکمل کمرشل بینک کی حیثیت سے خریدنے میں دلچسپی رکھتا ہے اور مئی تک معاہدہ ہونے کی توقع ہے، لیکن یو اے ای اسے کھلی بولی کے بجائے حکومتوں کے درمیان معاہدے کے تحت خریدنا چاہتا ہے۔